İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 389 Hüküm no: 375 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanako, Vasil, Yanço, Sava ve Yuvan’ın sahibi oldukları gedik hisselerini Kazzaz İspiro’ya sattıkları Saksılıhan’da lonca odasında Zikr-i âtî gedik âlâtının iştirâken mâlikleri Yanako v. Sarandi ve Vasil v. Lefter ve Yanço v. Sava ve Yuvan v. Gavril nâm zimmîlerden her biri meclis-i şer‘-i hatîrde kazzâz tâifesinden işbu bâ‘isü’s-sifr İspiro v. Yorgi nâm zimmî tarafından zikri âtî husûsda tasdîka vekîl-i şer‘îsi Yiğitbaşı Petro v. Yuvan nâm zimmî muvâcehesinde her biri ikrâr-ı tâm ve takrîr-i kelâm edip mahmiye-i İstanbul’da Çarşı-yı Kebîr’de Kalpakçılarbaşı nâm mahâlde Saksılıhan denmekle arîf hanın tabaka-i vüstâsında Taşhan cânibinde küçük aralık hizâsında kâin şehriye yedişer guruş kirâlı kazzâz ve ipekçi Rum ustalarına mahsûs lonca odası derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye yedimizde iştirâken mülkümüz olmağla biz ber-minvâl-i muharrer mâlikler olduğumuz âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mersûm İspiro zimmîye bin iki yüz guruşa bey‘ ü temlîk ve teslîm eylediğimizde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr bin iki yüz guruşu bize tamâmen def‘ ü teslîm ve biz dahi bi’t-tamâm ve’l-kemâl ahz u kabz ve beynimizde iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm gedik-i mezkûrda bizim aslâ ve kat‘â alâka ve medhalimiz kalmayıp müşteri-i müvekkil-i mesfûr İspiro zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 3 şehri Ramazani’l-mu‘azzam sene 1247 Şuhûdü’l-hâl: Kethüdâ vekîli Mehmed <> Reşid Ağa, Hüseyin Çelebi b. Yusuf el-Muhzır, Hafız İsmail Ağa b. Mehmed.