İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 390 Hüküm no: 376 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enserci Sava’nın kazzaz dükkânı gediğindeki hissesini kardeşi Keresteci Uğurlu’ya sattığı Kazzâz Mahrûse-i Galata’ya muzâfe Beşiktaş kasabasında mütemekkin Enserci Sava v. Aci Todori nâm zimmî meclis-i şer‘-i hatîrde li-ebeveyn er karındaşı işbu bâ‘isü’s-sifr Keresteci Uğurlu nâm zimmî muvâcehesinde ikrâr-ı tâm ve takrîr-i kelâm edip İstanbul’da Çarşı-yı Kebîr’de Cafer sokağı denmekle arîf sûkda Kalpakçılar karşısında Tülbentçiler sokağı başından Yağcılar sûkunda basmacı dükkânına müntehî oluncaya değin vâki‘ sokak tarafında Terzi Karabet zimmînin kazzâz dükkânı ittisâlinde kâin bir kepenk bir bâb kazzâz dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin dört sehm i‘tibârıyla bir sehmi benim ve bir sehmi karındaşım mersûm Uğurlu zimmînin ve iki sehmi karındaşlarımız gāibân ani’l-meclis Tanaş ve Vahralem? zimmîlerin yedimizde mülk-i mevrûsumuz olmağla ben gedik-i mezkûrdan akd-i âti’z-zikrin sudûruna değin ber-minvâl-i muharrer mâlik olduğum bir sehm hisse-i şâyi‘a-i mezkûremi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile karındaşım mersûm Uğurlu zimmîye beş yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş yüz guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda olan bir sehm hisse-i şâyi‘amda benim aslâ ve kat‘â alâka ve medhalim kalmayıp ol vechile gedik-i mezkûrun nısf hissesi karındaşım mersûm Uğurlu zimmînin ırsen ve şirâen mülk-i mahzı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 10 Ramazan sene 1247 Şuhûdü’l-hâl: Kethüdâ-i muhzırân İsmail Ağa, Kethüdâ Âkıl Bey. Yorgaki v. Anaştaş, Yiğitbaşı Petro <>, İspiro v. Yorgi.