İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 391 Hüküm no: 377 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı Yorgi’nin dükkân gediği hissesini diğer hisse sahibi Kazancı Panayot’a sattığı Kazgancı Âsitâne-i seniyye’de vâki‘ kazgancı esnâfından Yorgi v. Petro nâm zimmî meclis-i şer‘-i hatîrde yine esnâf-ı mersûmeden işbu hâmilü’r-rakīm Panayot v. Nikola nâm zimmî muvâcehesinde ikrâr-ı tâm ve takrîr-i kelâm edip İstanbul’da Alacahamam kurbünde el-Hâc Ahmed Ağa ve Kalonoğlu Lefter zimmî dükkânları beyninde kâin bir bâb kazgancı dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısfı mersûm Panayot zimmînin ve nısf-ı âharı dahi akd-i âti’z-zikrin sudûruna değin benim yedimizde mülkümüz olmağla ben ber-minvâl-i muharrer mâlik olduğum nısf hisse-i mezkûremi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Panayot zimmîye bin üç yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semen-i mezkûr bin üç yüz guruşu bana tamâmen def‘ ü teslîm ve ben dahi yedinden ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrda olan nısf hissemde benim aslâ ve kat‘â alâka ve medhalim kalmayıp mecmû‘u mersûm Panayot zimmînin mülk-i müşterâsı ve hakk-ı sırfıdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Ramazan sene 1247 Şuhûdü’l-hâl: Kethüdâ Mustafa Ağa, Yiğitbaşı es-Seyyid Mehmed Ağa. Kabzımâl Filibos, Aci Lefter oğlu Nikola, Andranik v. Yorgi.