İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 391 Hüküm no: 378 Orijinal metin no: [71a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüp kazasındaki çömlekçi esnafı kethüdalığına İsmail Ağa’nın tayin edildiği Kethüdâ nasbı Medîne-i Eyüb’de vâki‘ çömlekçi esnâfının kethüdâları olan Mustafa Ağa b. İbrahim kethüdâlık-ı mezkûrdan bu def‘a bi’t-terâzî keff-i yed eylediğine binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâsları [ve] hâlâ muhtesib-i İstanbul sa‘âdetlü Mehmed Emin Faik Efendi’nin re’yi munzam idiği tarafından mürsel çukadârı Mustafa Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb İsmail Ağa b. Ali nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā semt ü imlâ olundu. Fî 6 L sene [1]247 Şuhûdü’l-hâl: Ali b. Ahmed, es-Seyyid Süleyman b. İbrahim, es-Seyyid el-Hâc Mehmed b. es-Seyyid Ahmed, Mehmed b. Ahmed ve gayruhum. Tekfur v. İstefan zimmî, Bedros v. Artin zimmî, Artin v. Bedros zimmî.