İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 392 Hüküm no: 379 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul yufkacı esnafı kethüdalığına Mustafa’nın tayin edildiği Kethüdâ nasbı Kayd-ı ihrâc-şüd Fî 10 R sene [12]60 Âsitâne-i seniyye’de vâki‘ yufkacı esnâfının kethüdâları olan Veliyyüddin b. Mehmed bu def‘a vefât etmekle yerine esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâsları ve hâlâ muhtesib-i İstanbul sa‘âdetlü Mehmed Emin Faik Efendi’nin re’yi munzam idiği tarafından mürsel çukadârı el-Hâc Kadri Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb Mustafa b. Osman nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā semt ü imlâ olundu. Fî 6 L sene [1]247 Şuhûdü’l-hâl: Es-seyyid Veliyyüddin b. es-Seyyid Mehmed, Mehmed Emin b. Mehmed, Osman Ağa b. Halil, es-Seyyid Veliyyüddin b. Ahmed ve gayruhum.