İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 392 Hüküm no: 380 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Ali Ağa’nın dükkân gediğini Tütüncü Sarı Panayot’a sattığı Tütüncü Mahmiye-i İstanbul’da Sultan Selim <> kurbünde Tercüman Yunus mahallesinde sâkin Duhânî es-Seyyid Ali Ağa b. es-Seyyid Yusuf nâm kimesne meclis-i şer‘-i hatîrde işbu bâ‘isü’s-sifr Maronyalı Tütüncü Sarı Panayot v. Dimitri nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Ebulfeth Sultan Mehmed civârında Haffâfhâne kapısı karşısında kâin şehriye beş guruş kirâ-i kadîmeli Ma‘den kaleminde mülgā Otuzdokuz Cemâ‘at ustası Halil b. Mehmed ismine mukayyed ve mu‘teber tahtında kârgir mahzeni müştemil altı kepenk bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Panayot zimmîye dört bin yedi yüz elli guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr dört bin yedi yüz elli guruşu bana tamâmen def‘ ü teslîm ve ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Panayot zimmînin mülk-i müşterâsı ve hakk-ı sırf olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 26 Şevvâl sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yiğitbaşı Hafız Ahmed Ağa, Yazıcı Mehmed Efendi, Muhzır Hüseyin Çelebi.