İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 393 Hüküm no: 381 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul berber esnafının kethüda vekili İbrahim Ağa’nın azledilerek yerine Mustafa b. Halil’in tayin edildiği Kethüdâ nasbı Âsitâne-i seniyye’de berber esnâfından kethüdâ vekîli olan el-Hâc İbrahim Ağa bu def‘a bi’l-iktizâ vekâlet-i mezkûreden azlolunduğuna binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada mektûbü’l-esâmî Müslimînin ihbâr ve iltimâslarıyla ve hâlâ muhtesib-i İstanbul sa‘âdetlü Mehmed Emin Faik Efendi’nin re’yi munzam idiği tarafından mürsel çukadârı Ömer Ağa’nın inhâsıyla zâhir olan esnâf-ı mezkûreden işbu bâ‘isü’l-kitâb Mustafa Ağa b. Halil’i hâkim-i hâsim vâlâ cenâb veffekallâhu te‘âlâ bi’s-sıdk ve’s-savâb efendi hazretleri esnâf-ı merkūme üzerine kethüdâ vekîli nasb u ta‘yîn ve esnâf-ı mezkûreden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemek emr ü tenbîh buyurduklarında ol dahi kabû[l] ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā semt ü imlâ olundu. Fî 6 L sene [12]47 Şuhûdü’l-hâl: Şeyh Mustafa Efendi, Du‘âcı İsmail Efendi, Kâtib es-Seyyid el-Hâc Abdurrahman Efendi. Yiğitbaşı el-Hâc Mehmed Nuri Ağa ve gayruhum. Köşe ustası Mehmed, Köşe ustası Mehmed Emin, Köşe ustası es-Seyyid Ali, Köşe ustası el-Hâc Mehmed Ârif.