Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 435 Hüküm no: 513 Orijinal metin no: [83b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. İbrahim’in Görele Keramet köyünde yıktığı değirmenin zararını ödemesi Vilâyet-i Anadolu’da Görele kazâsına tâbi‘ Kerâmet nâm karye sükkânından Mehmed nâm kimesne meclis-i şer‘-i şerîf-i enverde İznik kazâsına tâbi‘ Çakırca nâm karyede sâkin işbu bâ‘isü’l-kitâb diğer Mehmed Bey b. İbrahim mahzarında ikrâr ve takrîr-i kelâm edip mârrü’z-zikr Kerâmet nâm karyede vâki‘ mutasarrıf olduğum tarlam içinde nehr-i Lice? ile dâir kadîmî değirmen ocağımı kendi malımla binâ ve ihyâ eylediğimden mezbûr Mehmed Bey mârrü’z-zikr değirmeni bi gayri hakkın hedm ve kerestesini istihlâk etmekle mârrü’z-zikr ebniyenin hîn-i hedm ve istihlâkinde kıymet-i şer‘iyyesi beş yüz guruş idiğini ba‘de’l-beyân meblağ-ı mezbûru mezkûr Mehmed Bey’den da‘vâ-yı mezkûrumdan merkūm Mehmed Bey ile beynimizde üç yüz guruş üzerine akd-i müsâlaha olundukda ben dahi sulh-i mezbûru kabûl ve bedel-i sulh olan meblağ-ı mezbûr üç yüz guruşu yedinden alınıp kabz edip ziyâdeye müte‘allika [84a] âmme-i da‘vâdan mezbûr Mehmed Bey’i ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm husûs-ı mezbûra müte‘allika mezkûr Mehmed Bey ile da‘vâ ve nizâ‘ım kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Osman Ağa b. Ali, Mustafa Efendi b. Bekir imâm, Sarrâczâde Mehmed Efendi [b.] el-Hâc Halil.