İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 394 Hüküm no: 383 Orijinal metin no: [71b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Nako’nun üç adet kasap dükkânı hisselerini satmak üzere damadı Kasap Vasil’i vekil tayin ettiği Vekâlet Âsitâne-i seniyye’de vâki‘ kasab tâifesinden Nako v. Mitro nâm zimmî meclis-i şer‘-i hatîrde işbu bâ‘isü’s-sifr güveyisi Kasab Vasil v. Kendo nâm zimmî muvâcehesinde ikrâr ve takrîr-i kelâm edip Hüdâvendigâr-ı esbak cennet-mekân firdevs-âşiyân merhûm ve mağfiret-nişân Sultan Abdülhamid Han -tâbe serâhu- hazretlerinin evkāf-ı şerîfeleri mülhakātından Yedikule hâricinde vâki‘ gayrı ez-selhhâne-i mîrî on aded ganem selhhânelerine merbût kasab dükkânlarından olup Beşiktaş kasabası ve Ortaköy ve Arnabud (Arnavut) karyelerinde kâin üç bâb kasab dükkânları derûnlarında mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmelerin sümün hisseleri benim [bâ-izn-i] mütevellî bi’l-icâreteyn tasarrufumda olmağla ben dekâkîn-i mezkûreden hisse-i mezkûrelerimi bedel-i misillerine bâ-re’y-i mütevellî âhara ferâğ ve tefvîz ve bedelini ahz u kabz edip işbu hâzır bi’l-meclis kasab diğer [72a] Vasil zimmînin babası ve müvekkili Petro v. Kosta nâm zimmîye cihet-i karzdan bâ-i‘lâm-ı şer‘î mahkûmün-bih deynim olan üç bin yüz guruşu vekîl-i hâzır-ı mersûma edâ ve fazla kalır ise bana def‘ ü teslîme tarafımdan güveyim mersûm Vasil zimmîyi vekâlet-i sahîha-i şer‘iyye ile vekîl ve nâib-i menâb nasb u ta‘yîn eylediğimde ol dahi vekâlet-i mezkûreyi kabûl ve merâsimini edâya ta‘ahhüd ve iltizâm eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 Şevvâl sene 1247 Şuhûdü’l-hâl: Halil b. Süleyman, Hüseyin b. Yusuf.