İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 395 Hüküm no: 384 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ece Katya Nasraniyenin bir miktar parasını Lusya’ya ve bir gerdanlığını Uskohi’ye hibe edip bütün eşyalarını da Lusya’ya sattığı Husûs ile eşyâ mübâya‘ası Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri’çün cânib-i şerî‘at-i kaviyyü’l-esâsdan me’zûnen irsâl olunan Kâtib Ahmed Hamid Efendi mahmiye-i İstanbul’da Samatya nezdinde Abdi Çelebi mahallesinde vâki‘ Leblebici es-Seyyid Ahmed Ağa menzili denmekle arîf Kürkçü Bogos zimmînin müsteciren mütemekkin olduğu bir bâb menzile varıp zeyl-i kitâbda mektûbü’l-esâmî Müslimîn huzûrlarında akd-i meclis-i şer‘-i nebevî ettikde menzil-i mezkûrda mütemekkine ve şahsı Müslimûn-ı merkūmûn ta‘rîfleriyle mu‘arrefe Ece Katya bt. Aci Haçador v. Hüdaverdi nâm Nasrâniye meclis-i ma‘kūd-ı mezkûrda li-ebeveyn er karındaşı Kuyumcu Aci Mardiros zimmînin sulbiye kebîre kızı ve mersûm Bogos zimmînin zevcesi olup kezâlik şahsı müslimûn-ı mezbûrûn ta‘rîfleriyle mu‘arrefe olan işbu bâ‘isetü<<’l-evsîka>>r-rakīm Lusya nâm Nasrâniye muvâcehesinde mesfûre Lusya Nasrâniyenin sadriye kebîre kızı mu‘arrefetü’ş-şahs Uskohi bt. el-mersûm Bogos nâm Nasrâniye hâzıra olduğu hâlde ikrâr-ı tâm ve takrîr-i kelâm edip hibe-i âti’z-zikrin sudûruna değin yedimde mâlım olup işbu meclis-i ma‘kūd-ı mezkûrda mu‘âyene olunan iki bin guruş nakdimi mersûme Lusya Nasrâniyeye ve altın üzerine masnû‘ bir elmas gerdanlığımı dahi hâzıra-i mersûme Uskohi Nasrâniyeye hibe ve temlîk ve her birine teslîm eylediğimde onlar dahi ber-minvâl-i muharrer meclis-i hibede bilâ-mâni‘ ittihâb ve temellük ve tesellüm ve kabz ve kabûl eylediklerinden sonra akd-i âti’z-zikrin sudûruna değin yedimde mâlım olan yün memlû bir mavi döşek ve iki köhne basma yorgan ve iki köhne bez gömlek ve iki köhne bez don ve iki köhne baş yasdığı ve bir köhne şeytan bezi anteri ve bir köhne mavi çuka ferâce ve bir sagīr tencere ve bir sagīr sahan ve bir sini ve bir tahta sandığımı tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile ancak mesfûre Lusya Nasrâniyeye yüz yedi guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip fîmâ-ba‘d semeni olan meblağ-ı mezkûr yüz yedi guruşun mütâlebesine ve husûs-ı mezkûra müte‘allika âmme-i da‘vâdan mersûme Lusya Nasrâniye ile hâzıra-i mersûme Uskohi Nasrâniyeden her birinin zimmetlerini ibrâ-i âmm-ı sahîh-işerî ile ibrâ ve iskāt eylediğimde onlar dahi ibrâ-i mezkûrumu kabûl etmeleriyle zikirleri mürûr eden nakd ve gerdanlık ile eşyâ-i muharrere-i mezkûrede benim aslâ ve kat‘â alâka ve medhalim kalmayıp mersûmetânın emlâk-ı mevhûbe ve müşterâları olup ve mesfûre Lusya Nasrâniye ile ma‘an mütemekkineler olduğumuz menzil derûnunda üzerimde lâbise olduğum <> köhne libâsımdan gayrı ismi mâl ıtlâk olunur nesnem olmayıp mecmû‘u mersûme Lusya Nasrâniyenin mülk-i mahzı ve hakk-ı sırfıdır dedikde gıbbe’t-tasâduki’ş-şer‘î vâki‘ hâli kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu] Fî 10 Şevvâl sene 1247 Şuhûdü’l-hâl: Leblebici es-Seyyid İsmail Ağa b. es-Seyyid Hüseyin, Zahîreci es-Seyyid İsmail Efendi b. es-Seyyid Ahmed, Çukadâr Mehmed Nazif Ağa b. Abdullah, Leblebici es-Seyyid Ahmed Ağa b. es-Seyyid Hüseyin, Muhzır Hüseyin Çelebi b. Yusuf. Şerbetçi Nikegos v. Karabet, Avakim v. Atam, Terzi Kerube v. Bogos.