İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 396 Hüküm no: 385 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri’nin sütçü dükkânı gediğindeki hissesini Yuvan’a sattığı Kaymakçı ve sütçü İhrâc-şüd Fî 28 Ş sene [12]52 Mahmiye-i İstanbul’da Küçükmustafapaşa kurbünde Gül Câmi‘i mahallesinde mütemekkin Dimitri v. Kosti nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Yuvan v. Tarpo zimmî muvâcehesinde ikrâr-ı tâm ve takrîr-i kelâm edip mahalle-i mezbûrede vâki‘ simitçi ve bakkāl dükkânları beynlerinde kâin bir bâb sütçü dükkânı derûnunda mevcûde beyne’l-hıref gedik ta‘bîr olunur bir tencere ve bir terâzî ma‘a derâhim ve bir ayran tası ve bir akçe tahtası ve sâir âlât-ı lâzıme-i ma‘lûmenin nısf-ı şâyi‘i karındaşım gāib ani’l-meclis Vasil zimmînin ve nısf-ı şâyi‘i-i âharı akd-i âti’z-zikrin sudûruna değin bâ-hüccet-i şer‘iyye iştirâken ve şâyi‘an yedimizde emvâlimiz olmağın hâlâ ben dükkân-ı mezkûr derûnunda mevcûde gedik ta‘bîr olunan âlât-ı lâzıme-i muharrere-i mezkûrede ber-vech-i muharrer mâlik olduğum nısf hises-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide <> ve müşterekim karındaşım gāib-i mersûmun izniyle sekiz yüz guruşa mersûm Yuvan zimmîye bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr sekiz yüz guruşu bana def‘ ü teslîm eylediğinde ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm dükkân-ı mezkûr derûnunda mevcûde gedik ta‘bîr olunan âlât-ı lâzıme-i muharrere-i mezkûrenin nısf-ı şâ<>yi‘i mersûm Yuvan zimmînin emvâl-i müşterâsı ve hakk-ı sırfı olup benim kat‘â alâka ve medhalim kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 13 Şevvâl sene 1247 Şuhûdü’l-hâl: Kethüdâ İsmail Ağa b. Hüseyin, Yiğitbaşı Ebubekir Ağa b. Hüseyin, el-Hâc Ömer Ağa b. el-Hâc Hüseyin. Yani v. Tarko zimmî, Petro v. Bando zimmî, Sireri? v. Petro zimmî, Yuvan v. Yorgi zimmî, Hıristo v. Yorgi zimmî.