İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 397 Hüküm no: 386 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Zaharya’nın bakkal gediği hissesinin yarısını Bakkal Yuvan’a sattığı Bakkāl Âsitâne-i aliyye’de vâki‘ bakkāl tâifesinden Zaharya v. Luka nâm zimmî meclis-i şer‘-i hatîrde yine tâife-i mersûmeden işbu bâ‘isü’<>s-sifr Yuvan v. Anaştaş nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Kumkapı dâhilinde Nişancı Mehmed Paşa-yı Atîk hamamı ittisâlinde kâin İbrahim Ağa dükkânı denmekle arîf ma‘lûmü’l-hudûd bir bâb bakkāl dükkânı ve dükkân-ı mezkûra merbût bir bâb mağaza derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmişer sehm i‘tibârıyla altmış sehmi [72b] gāib ani’l-meclis Simyon v. Apostol zimmînin ve mâ‘adâ altmışar sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde iştirâken mülkümüz olmağla gedik-i mezkûrlardan ben ber-minvâl-i muharrer mâlik olduğum altmışar sehm hisse-i şâyi‘amın otuzar sehmi[ni] yedimde ibkā ve bâkī otuzar sehmini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşterekim gāib-i mersûmun izniyle mersûm Yuvan zimmîye iki bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin guruşu bana def‘ ü teslîm ve ben dahi yedinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrların ber-i‘tibâr-ı merkūm otuzar sehmde benim aslâ ve kat‘â alâka ve medhalim kalmayıp müşteri-i mersûm Yuvan zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 2 Ramazan sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako v. Vasil, Ustabaşı Ananosti, Kabzımâl Sava, Yani v. Kosta.