İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 398 Hüküm no: 387 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino ile kızları Uğuri ve Sultane’nin bakkal dükkânı gediklerindeki hisselerini Dimitri’ye sattıkları Bakkāl Balipaşa’da Mahmiye-i İstanbul hısnı ebvâbından Edirnekapısı dâhilinde Sarmaşık kurbünde mütemekkineler Despino bt. Hıristo ve sadriye kebîre kızları Uğuri ve Sultane bintey Dimitri nâm Nasrâniyelerden mersûme Despino Nasrâniyenin li-ebeveyn er karındaşı ve taraflarından husûs-ı âti’l-beyânda vekîl olduğu şahıslarını ârifân Kostandi v. Dimo ve Ligor v. Kostandi nâm zimmîler şehâdetleriyle sâbit olan bakkāl ustabaşılarından Ananosti v. Hıristo nâm zimmî meclis-i şer‘-i hatîrde müvekkilât-ı mersûmâtdan mersûm[e] Despino Nasrâniyenin sadrî kebîr oğlu işbu bâ‘isü’s-sifr Dimitri v. Yani nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i mezbûrede Kumkapı civârında Balipaşa nâm mahâlde çeşme karşısında kâin Sarrâcbaşı dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi İbrahim Efendi’nin ve otuz yedi sehmi mesfûr Dimitri zimmînin ve altı sehmi müvekkilât-ı mersûmâtdan mersûme Despino Nasrâniyenin ve sekizer buçuk sehmden on yedi sehmi mersûmetân Uğuri ve Sultane Nasrâniyelerin akd-i âti’z-zikrin sudûruna değin yedlerinde mülkleri olmağla ben müvekkillerim mersûmâtın ber-minvâl-i muharrer mâlikeler oldukları cem‘an yirmi üç sehm hisse-i şâyi‘alarını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Dimitri zimmîye dokuz yüz elli guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr dokuz yüz elli guruşu bana def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-vekâle ve bi’l-asâle kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrun otuz yedi sehmi mukaddemâ ve yirmi üç sehmi hâlâ ki cem‘an altmış sehm hisse-i şâyi‘alarında müvekkillerim mersûmâtın aslâ ve kat‘â alâka ve medhalleri olmayıp müşteri-i mesfûr Dimitri zimmînin mülk-i müşterâsı ve hakk-ı sırfıdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 Ramazan sene 1247 Şuhûdü’l-hâl: Pazarbaşı Süleyman Ağa, [Bölükbaşı] Abdi Çelebi. Bakkāl Kostandi v. Nikolaki, Yorgi v. Yani, Todori v. İstemol.