İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 399 Hüküm no: 388 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavniye ve Despino’nun bakkal dükkânı gediğindeki hisselerini Bakkal Yuvan’a sattıkları Bakkāl Vilâyet-i Anadolu’da Arabsun kazâsına tâbi‘ Senyesun karyesinde mütemekkineler İstavniye bt. Kostandi ve Despino bt. Todori nâm Nasrâniyelerden mersûme Despino Nasrâniyenin sadrî kebîr oğlu ve taraflarından husûs-ı âti’l-beyânda vekîlleri olduğu şahıslarını bilir Sarafim v. Yuvan ve İstavri v. diğer Yuvan nâm zimmîler şehâdetleriyle sâbit olan Yorgi v. Kiyanus nâm zimmî meclis-i şer‘-i hatîrde bakkāl tâifesinden işbu bâ‘isü’s-sifr Yuvan v. Anaştaş nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Mahmudpaşa başında Akarçeşme üstünde kâin Ali Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi hâlik Aci Lazari zimmî veresesinin ve otuz sehmi başka Yuvan zimmînin ve mâ‘adâ otuz sehmi dahi akd-i âti’z-zikrin sudûruna değin anam ve müvekkilelerim mersûmetânın yedlerinde şâyi‘an mülkleri olmağla gedik-i mezkûrdan anam ve müvekkilelerim mersûmetânın ber-minvâl-i muharrer mâlikeler oldukları otuz sehm hisse-i şâyi‘a-i mezkûrelerini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Yuvan zimmîye bin iki yüz guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sona semeni olan meblağ-ı mezkûr bin iki yüz guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrun hisse-i şâyi‘asında anam ve müvekkilelerim mersûmetânın aslâ ve kat‘â alâka ve medhalleri kalmayıp müşteri-i mersûm Yuvan zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 11 Şevvâl sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Gedikpaşalı Yuvan, Ustabaşı Vasil, Ustabaşı Kiryako, Kabzımâl Sava.