Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 436 Hüküm no: 514 Orijinal metin no: [84a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın Ali Efendi b. Mustafa’dan aldığı câriyenin ücretini ödemesi Min mümzâtihî Mahmiye-i İstanbul’da Osman Paşa mahallesinde sâkin işbu bâ‘isü’l-kitâb Ali Efendi b. Mustafa meclis-i şer‘-i şerîf-i enverde Siyavuş Emine bt. Abdullah muvâcehesinde üzerine da‘vâ ve takrîr-i kelâm edip târih-i kitâbdan on beş gün mukaddem kumral kaşlı sarı ala gözlü orta boylu Çerkesiyyü’l-asl Naziki bt. Abdullah nâm câriye-i memlûkemi nakid ile yüz altmış guruşa bey‘ ile ve semenini kabz etmeden câriye-i mezbûreyi müşterîsine teslîm etmeden câriye-i mezkûreyi mezbûr Emine’ye teslîm ol dahi minvâl-i muharrer üzre câriye-i mezkûreyi ahz u kabz etmeğin hâlâ mezbûre Emine’den câriye-i mezkûreyi bey‘ etti ise semenini taleb eylediğimde bana edâ ve teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûre Emine cevâbında fi’l-hakīka müdde‘î-i mezbûr mevsûfe-i mezbûreyi yüz altmış guruşa bey‘ edip semenini kabz etmeden câriye-i mezbûreyi teslîm etmemek üzre bana tenbîh ben dahi ber vech-i muharrer kabz etmişdim lâkin Cafer Çavuş nâm kimesne câriye-i mezbûreyi benden yüz altmış guruşa iştirâ ve ben teslîm edip [mezbûr] mevsûfe-i mezbûreyi alıp gaybet etmişdir deyû mezbûr Ali Efendi’nin emrine muhâlif eylediği mezkûr yüz altmış guruşu müdde‘î-i mezbûra red ve teslîm lâzım geldiğini bi tav‘ihâ ikrâr ve i‘tirâf etmeğin mûcebiyle câriye-i mezbûre mevcûde ise aynını ve illâ yevm-i bey‘de semeni olduğunu i‘tirâf eylediği meblağ-ı mezbûru müdde‘î-i mezbûra bi tarîki’d-damân red ve teslîme mezbûre Emine ilzâm olunup işbu vesîka bi’t-taleb ketb olundu. Fi’l-yevmi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Es-Seyyid Hasan Çelebi b. Mehmed, Ahmed Çelebi b. Mehmed, Mehmed Beşe b. Abdullah, Mustafa Efendi b. Ramazan, İbrahim Çelebi [b.] Ahmed.