İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 405 Hüküm no: 396 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duhancı İnözlü Manol’un tütüncü dükkânı gediğini tütüncü esnafından Lazari ve Kiryako’ya sattığı Tütüncü Âsitâne-i seniyye’de vâki‘ duhânî esnâfından olup zikr-i âtî gedik âlâtının mâliki İnözlü Manol v. Françesko nâm zimmî meclis-i şer‘-i hatîrde tâife-i mersûmeden işbu bâ‘isü’r-rakīm Marolyalı Lazari v. Yani ve Marolyalı Kiryako v. Kiryako nâm zimmîler muvâcehelerinde ikrâr-ı tâm ve takrîr-i kelâm edip İstanbul’da Aksaray kurbünde hâlâ sabuncu ve Ma‘den kaleminde mukaddemi i‘tibârına nazaran na‘lçacı dükkânı ittisâlinde kâin Ali Beşe ismine mukayyed ve mu‘teber bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmân Lazari ve Kiryako zimmîlere ale’l-iştirâk altı bin guruşa bey‘ ü temlîk ve teslîm eylediğimde onlar dahi ber-minvâl-i meşrûh iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr altı bin guruşu müşteriyân-ı mersûmân bana tamâmen def‘ ü teslîm ve ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteriyân-ı mersûmânın iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 L sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yazıcı Mehmed Efendi, Yiğitbaşı Hafız Ahmed Ağa ve gayruhum.