İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 406 Hüküm no: 397 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryakiye’nin bakkal gediğindeki hissesini Kadinko’ya sattığı Bakkāl Mahmiye-i İstanbul’da Çarşambapazarı kurbünde Tevkī‘î Cafer mahallesinde mütemekkine ve şahsı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Kiryakiye bt. Bakkāl Tanaş nâm Nasrâniye meclis-i şer‘-i hatîrde mahmiye-i mezbûrede Çakırağa mahallesinde mütemekkine kezâlik şahsı Salamon ta‘rîfleriyle mu‘arrefe olan işbu bâ‘isetü’s-sifr Kadinko bt. Panayot nâm Nasrâniye muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Balatkapısı dâhilinde hamam kurbünde Ali Çelebi dükkânı denmekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Sarafim nâm zimmînin ve elli sehmi Lazari zimmînin ve bâkī kırk sehmi dahi akd-i âti’z-zikrin sudûruna değin benim bâ-hüccet yedimizde irsen ve şirâen mülkümüz olmağla gedik-i mezkûrdan ben ber-minvâl-i muharrer mâlike olduğum kırk sehm hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ve müştereklerim izinleriyle mersûme Kadinko Nasrâniyeye dört bin guruşa bey‘ ü temlîk ve lâyıkı vechile teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr dört bin guruşu mersûme Kadinko Nasrâniye bana tamâmen def‘ ü teslîm ve ben dahi yedinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm hisse-i mezkûrede benim aslâ ve kat‘â alâka ve medhalim kalmayıp müşteriye-i mersûme Kadinko Nasrâniyenin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 16 Şevvâl sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Ananosti, Kabzımâl Sava, Bakkāl Tanaş v. Nikola mütemekkin-i Bâb-ı Edirne.