İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 407 Hüküm no: 398 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazancı Ali Ağa’nın dükkân gediğindeki hissesinin yarısını ortağı Yani’ye sattığı Kazgancı Trabzon kazâsı ahâlîsinden olup mahmiye-i İstanbul’da Bahçekapısı dâhilinde Çilingirler sûkunda kazgancı dükkânında sâkin Ali Ağa b. Yakub nâm kimesne meclis-i şer‘-i münîrde işbu bâ‘isü’s-sifr şerîki Yani v. Lefter nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Yeni Câmi‘-i şerîf kapısı karşısında çilingir ve kazgancı dükkânları beynlerinde kâin bir bâb kazgancı dükkânı derûnunda mevcûde beyne’l-esnâf gedik ta‘bîr olunur bir körük ve on çekiç ve bir kantar ve bir örs ve iki mikrâs ve sâir âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben ber-minvâl-i muharrer mâlik olduğum gedik-i mezkûrun nısf hissesini yedimde ibkā ve nısf-ı âharını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Yani zimmîye bin altı yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr bin altı yüz elli guruşu bana def‘ ü teslîm ve ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrun nısf hisse-i şâyi‘asında benim aslâ ve kat‘â alâka ve medhalim kalmayıp müşteri-i mersûm Yani zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 13 Şevvâl [sene 1247] Şuhûdü’l-hâl: Kethüdâ Mustafa Ağa, Yiğitbaşı es-Seyyid Mehmed Ağa, Mütevellî İbrahim Usta, Odacı Hüseyin Çelebi.