İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 408 Hüküm no: 400 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi İstifo’nun simitçi dükkânı gediği hissesini Simitçi Kosta’ya sattığı Âhar hüccet fî 11 L sene [12]55 Topkapı dâhilinde keresteci ve attâr beyninde simitçi Asıl hüccet târîhi fî 13 Za sene 1244 İşbu sebt-i hâmiş olunan hüccetde ismi mastûr Simitçi İstifo v. Yorgi nâm zimmî meclis-i şer‘-i hatîrde işbu hâmilü’l-hâmiş Simitçi Kosta v. Dimo nâm zimmî muvâcehesinde ikrâr-ı tâm ve takrîr-i kelâm edip hilâl-i sütûr-ı hüccetde mastûr bir bâb simitçi dükkânı derûnunda mevcûde beyne’l-esnâf gedik ta‘bîr olunun âlât-ı lâzımenin yüz yirmi sehm i‘tibârıyla otuz sehmi Göke İbrahim Ağa veresesinin ve mâ‘adâ doksan sehmi ber-mantûk-ı hüccet akd-i âti’z-zikrin sudûruna değin benim yedimde şirâen mülküm olmağla ben ber-minvâl-i meşrûh mâlik olduğum doksan sehm hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Kosta zimmîye beş bin guruş semen-i medfû‘ ve makbûza bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika âmme-i <> de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 29 Şevvâl sene 1247 Şuhûdü’l-hâl: Kethüdâ-i esbak el-Hâc Halil Ağa, Sâbık Kethüdâ es-Seyyid el-Hâc İbrahim Ağa, Alacahamamlı Hüseyin Ağa, Bahçekapılı İbrahim Ağa, Tophâne kurbünde el-Hâc Ali Ağa, Yiğitbaşı Mustafa, Muhzır Hüseyin Çelebi.