Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 437 Hüküm no: 515 Orijinal metin no: [84a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa b. Mustafa b. Hüseyin’in alacaklarının tahsil edildiği ve borçlarının terekesinden ödendiği Min mümzâtihî Sakabaşı olup tarîk-i hacc-ı şerîfde bundan akdem vefât eden merhûm el-Hâc Hüseyin Ağa b. Mustafa b. Hüseyin’in verâseti li üm karındaşları Âsiye ve Fâtıma li eb karındaşları Döndü ve Hatice nâm hâtunlara münhasıra olduğu lede’ş-şer‘i’l-enver sâbit ve mütehakkik oldukdan sonra mezbûre Hatice ba‘de’t-ta‘rîfi’ş-şer‘î asâleten ve mezkûre Âsiye tarafından husûs-ı âti’l-beyâna vekîl-i müsecceli olan zevci Ömer b. Halil ve mezkûre Döndü’nün kezâlik husûs-ı câ’î vekîl-i müsecceli olan zevci Murad b. Mahmud ve mezkûre Fâtıma tarafından vekîl-i müseccel-i şer‘îsi Ali Efendi b. Yusuf nâm kimesne vekâleten meclis-i şer‘-i şerîf-i enverde ve mahfil-i dîn-i münîf-i ezherde işbu râfi‘ü’l-kitâb el-Hâc Ali İbrahim ve el-Hâc Mehmed b. Hasan nâm kimesneler muvâcehelerinde her biri ikrâr-ı sahîh-i şer‘î ve i‘tirâf-ı sarîh-i mer‘î kılıp mezbûrân el-Hâc Ali el-Hâc Mehmed’in müteveffâ-yı mezbûr el-Hâc Hüseyin Ağa’ya cihet-i deyn-i şer‘îden altı bin yüz elli esedî guruş zimmetlerinde lâzımü’l-edâ ve vâcibü’l-kazâ deynleri olup kable’l-istîfâ mezkûr el-Hâc Hüseyin Ağa vefât etmişdi el-hâletü hâzihî müteveffâ-yı mezbûrun Harameyn-i muhteremeyn vakfına iki bin guruş ve sucular kethüdâsı Mehmed Ağa b. Abdi Ağa’ya bin esedî guruş ve umdetü’l-mükerremât İsmihan Hanım’a üç bin guruş lâzımü’l-edâ deyni olmağla mütevellî-i vakf-ı mezkûr ve mûmâ-ileyh Mehmed Ağa ve Hanım-ı mezkûr vekîl-i şer‘îsi Hasan Çelebi câ’i’z-zikr meblağlar ile cümlemiz bir meclisde iken mezbûrân el-Hâc Ali ve el-Hâc Mehmed’in emirlerine havâle-i sahîha-i şer‘iyye ile havâle ve her biri ba‘de’l-kabûl bâkī kalan yüz elli guruşu mezkûrân el-Hâc Ali ve el-Hâc Mehmed işbu meclis-i şer‘de bize teslîm biz dahi bi’t-tamâm ve’l-kemâl ahz u kabz ve tesellüm eyleyip husûs-ı mezkûra müte‘allika mezkûrân el-Hâc Ali ve el-Hâc Mehmed ile da‘vâ ve nizâ‘ımız kalmamışdır dedikde gıbbe’t-tasdîki’ş-şer‘î bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Ali b. ( ), Ali Çelebi b. Abdullah, İbrahim Çelebi b. Ahmed, Mehmed b. İdris.