İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 415 Hüküm no: 410 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Dimitri’nin varislerinden Despino, Aleksan, Fruşni, Ezmerağda ve Anika’nın tütüncü gediği hisselerini varislerden Kadinko’ya sattıkları Tütüncü Mahrûse-i Galata’ya muzâfe İstinye nâhiyesine tâbi‘ Hümâyûnâbad nâm mahal mütemekkinlerinden ve Darbhâne-i âmire’de ecnâs sarrâflarından olup Vilâyet-i Anadolu’da Konya Karamanı’nda memûren mutavattın iken işbu târîhden dokuz sene mukaddem hâlik olan Dimitri v. Aleksan nâm zimmînin verâseti zevce-i metrûkesi Despino bt. Hürmüz nâm Nasrâniye ile sulbî kebîr oğlu Aleksan nâm zimmî ve sulbiye kebîre kızları Fruşni ve Ezmerağda ve Anika ve Kadinko ve Maryora nâm Nasrâniyelere münhasıra ve mesele-i mîrâsları elli altı sehmden olup sihâm-ı mezbûreden yedi sehmi zevce-i mersûme Despino Nasrâniyeye ve on dört sehmi oğlu mersûm Aleksan zimmîye ve yedişer sehmden otuz beş sehmi kızları mesfûrât Fruşni ve Ezmerağda ve Anika ve Kadinko ve Maryora Nasrâniyelere isâbeti tahakkukundan sonra verese-i mersûmûndan zevce-i mesfûre Despino Nasrâniye ve oğlu mersûm Aleksan zimmî ile kızları mersûmâtdan mesfûretân Ezmerağda ve Anika nâm Nasrâniyeler asâleten meclis-i şer‘-i hatîrde mersûme Fruşni Nasrâniyenin zevci ve tarafından vekîl-i sâbitü’l-vekâlesi sarrâf tâifesinden Yenihanlı Küçük Vasil v. Yorgi nâm zimmî hâzır olduğu hâlde işbu bâ‘isetü’s-sifr mesfûre Kadinko Nasrâniye tarafından husûs-ı âti’l-beyânda tasdîka vekîli Mimi v. Nikola nâm zimmî muvâcehesinde her biri bi’l-verâse ikrâr-ı tâm ve takrîr-i kelâm edip mahrûse-i mezkûre hısnı ebvâbından Karaki Kapısı dâhilinde Balıkçılar içinde Dörtyolağzı nâm mahâlde köşebaşında kâin Ma‘den kaleminde sebzeci karşısında Salaki ismine mukayyed ve mu‘teber yehûdhâne tahtında şehriye otuz guruş kirâlı altı aded demir parmaklıklı pencere iki nerdüban ve iki oda ve tahtında bir bodrumu müştemil bir kıt‘a kârgir tütüncü mahzeni derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme mûrisimiz hâlik-i mersûmun sağlığında ile’l-helâk yedinde mülkü ve ba‘de helâkihi ber-tashîh-i mezkûr bizimle müvekkile-i mersûme Fruşni ve müşteriye-i müvekkile-i mesfûre Kadinko ve gāibetü ani’l-meclis mersûme Maryora Nasrâniyelere mevrûs olmağla biz ve müvekkile-i mersûme Fruşni Nasrâniyeden her birimiz gedik-i mezkûrdan ber-minvâl-i muharrer mâlikler olduğumuz kırk iki sehm hisse-i mezkûrelerimizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîkimiz gāibe-i mersûme Maryora Nasrâniyenin izniyle müvekkile-i mersûme Kadinko Nasrâniyeye beş bin iki yüz elli guruşa bi’l-asâle ve bi’l-vekâle bey‘ ü temlîk ve her birimiz vech-i lâyıkı üzere teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr beş bin iki yüz elli guruşu müşteriye-i müvekkile-i mesfûre bize tamâmen ve def‘ ü teslîm ve biz dahi yedinden ahz u kabz ve bi-kadri’l-hısas beynimizde iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrdan ber-i‘tibâr-ı merkūm kırk iki sehm hisse-i irsiyemizde bizim aslâ ve kat‘â alâka ve medhalimiz kalmayıp yedi sehmi irsen ve kırk iki sehmi şirâen ki cem‘an kırk dokuz sehm hisse-i şâyi‘ası müşteriye-i müvekkile-i mersûme Kadinko Nasrâniyenin mülk-i mahzı ve hakk-ı sırfı olmuşdur dediklerinde gıbbe’t-tasâduki[‘ş-şer‘î mâ-vaka‘a bi’t-taleb ketb olundu] Fî 4 Za sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yiğitbaşı Hafız Ahmed Ağa, Yazıcı Mehmed Efendi.