İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 417 Hüküm no: 411 Orijinal metin no: [76a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şazik’in tütüncü dükkânı gediğini Sarraf Serkiz’e sattığı Langa’da tütüncü mübâya‘ası Mahmiye-i İstanbul hısnı ebvâbından Langa Yenikapısı dâhilinde Çobançavuş mahallesinde mütemekkine Şazik bt. Kirkor nâm Nasrâniyenin zevci ve tarafından husûs-ı âti’l-beyânda vekîl olduğu şahsını ârifân Kürkçü Asvader v. Lütfi ve Tülbentçi Abraham v. Esteban nâm zimmîler şehâdetleriyle sâbit olan Tütüncü Marat v. Artin nâm zimmî meclis-i şer‘-i hatîrde sarrâf tâifesinden işbu hâmilü’r-rakīm [76b] Serkiz v. Mıgırdıç nâm zimmî muvâcehesinde bi’l-vekâle ikrâr-ı tâm ve takrîr-i kelâm edip bâb-ı mezkûr dâhilinde Abacılar sûkunda berber dükkânı ittisâlinde kâin şehriye altı guruş kirâ-i kadîmeli Ma‘den kaleminde Hanife Hatun ismine mukayyed ve mu‘teber bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin zevcem ve müvekkilem mersûme Şazik Nasrâniyenin yedinde mülkü olmağla ben zevcem ve müvekkilem mersûmenin ber-minvâl-i muharrer mâlike olduğu gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Serkiz zimmîye altı bin guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr altı bin guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âm ile ibrâ ve iskāt eyledik fîmâ-ba‘d gedik-i mezkûrda zevcem ve müvekkilem mersûmenin aslâ ve kat‘â alâka ve medhali kalmayıp müşteri-i mesfûr Serkiz zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 6 Za sene [1]247 Şuhûdü’l-hâl: Eş-şâhidûnü’s-sâbikūn.