İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 417 Hüküm no: 412 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Ali Molla’nın sabuncu tablası ve aletlerindeki yarı hissesini Mustafa Ağa’ya sattığı Sabuncu tablası mübâya‘ası Mahmiye-i İstanbul’da Bâb-ı Âsafî kurbünde İmâm Ali mahallesinde sâkin sabuncu esnâfından Ali Molla b. Süleyman nâm kimesne meclis-i şer‘-i münîrde esnâf-ı merkūmeden işbu bâ‘isü’l-kitâb es-Seyyid el-Hâc Mustafa Ağa b. es-Seyyid Hasan nâm kimesne mahzarında ikrâr-ı tâm ve takrîr-i kelâm edip mahmiye-i mezbûrede Yeni Câmi‘-i şerîf avlusunda mevzû‘ bir aded sabuncu tablası ve bir terâzî ve ma‘a derâhim ve sâir âlât-ı lâzıme-i ma‘lûmenin nısfı Rüveyde nâm hatunun ve nısf-ı âharı dahi akd-i âti’z-zikrin sudûruna değin benim yedimizde iştirâken mülkümüz olmağla ben tabla ve âlât-ı mezkûreden ber-minvâl-i muharrer mâlik olduğum nısf hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile ve şerîkim merkūmenin izn ü icâzetiyle mezbûr es-Seyyid el-Hâc Mustafa Ağa’ya yedi yüz kırk guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip ve semen-i mezkûr yedi yüz kırk guruşu müşteri-i merkūm bana tamâmen def‘ ü teslîm ve ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d tabla ve âlât-ı mezkûrenin nısf hisse-i şâyi‘a-i mezkûresinde benim aslâ ve kat‘â alâka ve medhalim kalmayıp müşteri-i mezbûr es-Seyyid el-Hâc Mustafa Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî selhi L sene [1]247 Şuhûdü’l-hâl: Kethüdâ Mehmed Raşid Ağa, Yiğitbaşı Mehmed Ağa, el-Hâc Mustafa Ağa, es-Seyyid Ali Ağa, Derviş Ağa ve gayruhum.