Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 438 Hüküm no: 516 Orijinal metin no: [84a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. Şaban ile Nakkaş Paşazâde Abdülbâki Bey’in câriye satışından doğan borçtan sulh oldukları Mahmiye-i İstanbul’da Ayasofya kurbunda Taşodalarda sâkin ekmekçi el-Hâc Ali b. Şaban meclis-i şer‘-i hatîr-i lâzımü’t-tevkīrde mahmiye-i mezbûrda Demirkapı kurbunda Çelebioğlu mahallesinde sâkin umdetü’l-a‘yân ve’l-eşbâh Nakkāş Paşazâde Abdülbâkī Bey mahzarında ikrâr ve takrîr-i kelâm edip târih-i kitâbdan yirmi sene mukaddem mûmâ-ileyhin vâlide[si] merhûme Hanzâde Sultan’ın baş ağası ve abd-i mu‘takı olan İdris Ağa b. Abdullah’a beynimizde ma‘lûmetü’l-evsâf Gürciyyetü’l-asl bir re’s câriyemi yüz otuz guruşa bey‘ ve teslîm ol dahi iştirâ ve tesellüm ve kable’l-edâ ben hacc-ı şerîfe deryâdan giderken harbî kefere beni ahz ve on dört sene mikdârı esir edip ve ben dârü’l-harbde iken merkūm İdris Ağa fevt olup verâseti usûbet-i nesebiyye cihetinden mûmâ-ileyh Abdülbâkī Bey’e münhasıra olmağla mûmâ-ileyh Abdülbâkī Bey terekesine vaz‘ ve kabz eylemeğin hâlâ ben semen-i mezbûr yüz otuz guruşu müteveffâ-yı merkūm İdris Ağa’nın terekesine ber vech-i muharrer vâzı‘ü’l-yed olan mûmâ-ileyh Abdülbâkī Bey’den taleb ve da‘vâ eylediğimde ol dahi cevâbında mûrisim mezbûr İdris Ağa senden ber vech-i mübeyyen iştirâ ve kabz eylediği ma‘lûmum değildir deyû inkâr ve beynimizde münâza‘ât-ı kesîre [84b] vâkı‘a olmuşidi el hâletü hâzihî muslihûn tavassut edip mûmâ-ileyh Abdülbâkī Bey benimle beş guruş üzerine sulh oldukda ben dahi sulh-i mezbûru kabûl ve bedel-i sulh olan meblağ-ı mezbûr beş guruşu yedinden ahz u kabz ettiğimden sonra husûs-ı mezbûra ve gayra müte‘allika âmme-i da‘vâdan mûmâ-ileyh Abdülbâkī Bey’in zimmetini ibrâ-i âmla ibrâ ve iskāt eyledim min ba‘d da‘vâ ve nizâ‘ım yoktur dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Ağa b. Abdurrahman, Ahmed Beşe Çukadârı Abdülmennân, Mahmud Bey b. Mehmed, Receb Haseki b. Şaban.