İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 419 Hüküm no: 414 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zoviçe’nin bakkal dükkânı gediğindeki hissesini Bakkal Lazari’ye sattığı Bakkāl Salmatomruk’da Mahmiye-i İstanbul hısnı ebvâbından Edirnekapısı kurbünde Ka‘riye Alipaşa mahallesinde mütemekkine Zoviçe bt. Sotiri nâm Nasrâniye meclis-i şer‘-i hatîrde bakkāl tâifesinden işbu hâmilü’r-rakīm <> Lazari v. Yamandi nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Salmatomruk nâm mahâlde karakolhâne karşısında kâin Mustafa Ağa dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Yuvan zimmînin ve yirmi yedi buçuk sehmi mersûm Lazari zimmînin ve mâ‘adâ otuz iki buçuk sehmi dahi akd-i âti’z-zikrin sudûruna değin benim yedimizde mülkümüz olmağla ben gedik-i mezkûrdan ber-minvâl-i muharrer mâlik olduğum otuz iki buçuk sehm hisse-i şâyi‘amı [77a] tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîkim mersûmun izniyle mesfûr Lazari zimmîye bin iki yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin iki yüz elli guruşu müşteri-i mersûm bana tamâmen def‘ ü teslîm ve ben dahi yedinden ahz u kabz ve etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrun ber-i‘tibâr-ı merkūm mâlik olduğum otuz iki buçuk sehm hissesinde benim aslâ ve kat‘â alâka ve medhalim kalmayıp yirmi yedi buçuk sehmi mukaddemâ ve otuz iki buçuk sehmi hâlâ ki cem‘an altmış sehm hisse-i şâyi‘ası müşteri-i mersûm Lazari zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 Za sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Yoseb v. Vasil, Esteryo v. Tanaş, Yazıcı Yani.