İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 420 Hüküm no: 415 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniko ve Kadinko’nun havyarcı ve bakkal dükkânı gediklerinin kendilerine ebeveynlerinden intikal ettiğini ispat ettikleri ve kendilerine hüccet verilmesi Balat’da Yenidükkân ve civârında havyarcı ve Edirnekapısı’nda Meydancı bakkāl dükkânları ihbârları Mahmiye-i İstanbul hısnı ebvâbından Edirnekapısı dâhilinde Ka‘riye Alipaşa mahallesinde mütemekkine işbu bâ‘isetiyyü’s-sifr Eleniko ve Eğrikapı dâhilinde Çakırağa mahallesinde mütemekkine Kadinko bintey el-hâlik Panayot v. Manol nâm Nasrâniyelerden her biri meclis-i şer‘-i hatîrde takrîr-i kelâm ve ta‘bîr ani’l-merâm edip mahmiye-i mezbûre hısnı ebvâbından Balatkapısı hâricinde köşebaşında kâin Yenidükkân denmekle şehîr ma‘lûmü’l-hudûd bir bâb bakkāl ve civârında kâin kezâlik ma‘lûmü’l-hudûd bir bâb çorbacı (havyarcı) ve mârru’z-zikr Edirnekapısı dâhilinde kâin Meydancı dükkânı denmekle arîf yine hudûdu ma‘lûm bir bâb muhterik bakkāl dükkânı derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla altmışar sehmi babamız hâlik-i mersûm Panayot zimmî ve altmışar sehmi anamız hâlike Zafiriçe Nasrâniyeden ale’l-iştirâk mülk-i mevrûsumuz olup lâkin gedik-i mezkûrların ber-minvâl-i muharrer mülkümüz olduğunu nâtıka hüccetlerimiz olmamağla husûs-ı mezkûre esnâf-ı merkūmeden vukūf ve ıttılâ‘ları olan kimesnelerden istihbâr olunup kıbel-i şer‘den yedimize birer kıt‘a hüccet i‘tâ olunmak murâdımızdır dediklerinde fi’l-hakīka gedik-i mezkûrlar mersûmetân Eleniko ve Kadinko Nasrâniyelerin ebeveyni hâlikân-ı mesfûrândan mevrûs ale’l-iştirâk mülkleri olduğunu esnâf-ı mezkûreden zeyl-i vesîkada muharrerü’l-esâmî kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka bi’t-taleb ketb olundu. Fî 7 Zilka‘de sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Bakkāl Tanaş v. Niko, Bakkāl Esteryo v. Tanaş, Yazıcı Yani.