İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 422 Hüküm no: 418 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Bişmişoğlu yeğeni Ohannes’in tütüncü dükkânı gediğini Sarraf Serkiz’e sattığı Tütüncü Mahmiye-i İstanbul’da Yenihan sarrâflarından Bişmişoğlu yeğeni Ohannes v. Ohannes nâm zimmî meclis-i şer‘-i hatîrde Vâlide Hanı sarrâflarından işbu bâ‘isü’s-sifr Serkiz v. Bogos nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Sultan Bayezid-i Velî Câmi‘-i şerîfi avlusu ebvâbından Mürekkepçiler Kapısı dâhilinde Kâğıdçılar köşesinde kâin Ma‘den kaleminde Agop zimmî ismine mukayyed ve mu‘teber bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Serkiz zimmî[ye semen-i medfû‘ ve makbûza bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûru] bana def‘ ü teslîm ve ben dahi yedinden tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Serkiz zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki[‘ş-şer‘î mâ-vaka‘a bi’t-taleb ketb olundu] Fî 16 Za sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yiğitbaşı Hafız Ahmed Ağa, Yazıcı Mehmed Efendi.