İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 423 Hüküm no: 419 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ulemaya meşrut vakıf evi Mehmed Tahir Efendi’nin boşaltması üzerine evin Sofular mahallesi imamı Ali Efendi’ye tahsis edildiği Ulemâya meşrûta vakıf menzil tevcîhi İhrâc-şüd fî 5 M 1253 Dârü’l-hilâfeti’l-aliyye Kostantıniyyeti’l-mahmiye’de Sofular mahallesinde vâki‘ bir tarafdan ba‘zen mahalle-i mezbûre imâmı Mehmed Emin Efendi menzili ve ba‘zen câmi‘-i şerîfin arsa-i hâliyesi ve bir tarafdan Kâtib Mehmed Efendi veresesi menzili ve bir tarafdan Âişe Hatun menzili ve bir tarafdan tarîk-i âm ile mahdûd müştemilât-ı ma‘lûmeyi hâvî süknâsı ulemâya meşrûta bir bâb vakıf menzile tevcîh-i hâkimü’ş-şer‘le mutasarrıf olan es-Seyyid Mehmed Tahir Efendi b. es-Seyyid İbrahim menzil-i mezkûrdan bi’t-terâzî keff-i yed etmekle hâkim-i muvakkı‘-i sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri menzil-i mahdûd-ı mezkûru mahalle-i mezbûre imâmı olup ulemâdan ve erbâb-ı istihkākdan idiği zeyl-i kitâbda muharrerü’l-esâmî Müslimîn ihbârlarıyla zâhir ve mütehakkık olan işbu bâ‘isü’l-kitâb Ali Efendi b. Süleyman’a ber-mûceb-i şürût-ı vâkıf tevcîh buyurup zabt u tasarrufuna izin vermeğin mâ-hüve’l-vâki‘ bi’l-ibtigā sebt ü imlâ olundu. Fî 14 Za sene 1247 Şuhûdü’l-hâl: Es-seyyid Abdülkadir b. Said, el-Hâc Salih Efendi bin el-Hâc Mehmed, Muhzır Hüseyin Çelebi b. Yusuf, Kethüdâ-i muhzırân İsmail Ağa ve gayruhum.