İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 424 Hüküm no: 420 Orijinal metin no: [77b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Ağa’nın berber dükkânı gediğinin kendisine ait olduğunu ispat ettiğinden hüccet verilmesi Berber ihbârı Mahmiye-i İstanbul’da Yenibahçe kurbünde Ördekkasab mahallesinde sâkin Abdi Ağa b. Mehmed Latif meclis-i şer‘-i münîrde takrîr-i kelâm ve bast ani’l-merâm edip mahalle-i mezkûrede karakolhâne karşısında mestçi dükkânı ittisâlinde kâin bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme yedimde müstakıllen mülküm olup lâkin âlât-ı gedik-i mezkûr mülküm olduğunu nâtıka yedimde hüccetim olmamağla husûs-ı mezkûre esnâf-ı merkūmeden vukūf-ı tâmları olan kimesnelerden istihbâr olunup kıbel-i şer‘den yedime bir kıt‘a hüccet i‘tâ olunmak murâdımdır dedikde fi’l-hakīka gedik-i mezkûr merkūm Abdi Ağa’nın yedinde mülkü olduğunu berber esnâfından zeyl-i vesîkada mektûbü’l-esâmî kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka bi’t-taleb ketb ü imlâ olundu. Fî 22 Zilka‘de sene 1247 Şuhûdü’l-hâl: Mehmed Ağa b. Hüseyin, el-Hâc Mehmed Ağa b. Ahmed ve gayruhum.