Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 438 Hüküm no: 517 Orijinal metin no: [84b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Himmet b. Abdullah’ın ölümünde Süleyman Ağa b. Mustafa ve Mustafa Beşe b. Abdülbâki’nin sorumluluğu olmadığı Mahmiye-i İstanbul’da Dülgerzâde mahallesinde sâkin iken bundan akdem vefât eden Ali b. Himmet b. Abdullah’ın verâseti vâlidesi Kezban ve zevce-i menkûhası Râbia bt. Abdullah ve sagīr oğulları İsmail ve Ahmed’e münhasır olduğu şer‘an sâbit ve müte‘ayyin oldukdan sonra mezbûr İsmail ve Ahmed’in tesviye-i emirleriyçün kıbel-i şer‘den mansûb vasîleri olan mezbûr Râbia tarafından husûs-ı âti’l-beyâna vekîl-i müsecceli olan (...) b. Mehmed mahzarında ve mahfil-i kazâ-i lâzım-ı ri‘âyede yine mahalle-i mezbûre sükkânından işbu bâ‘isü’l-kitâb sâbıkan sarrâcbaşı olan Süleyman Ağa b. Mustafa ve hizmetinde olan Mustafa Beşe b. Abdülbâkī muvâcehelerinde üzerlerine da‘vâ ve takrîr-i kelâm edip mezbûrân Süleyman ve Mustafa Beşe müteveffâ-yı mezbûr Ali’nin vefâtından kırk gün mukaddem sille ile vurup andan nâşî fevt olmağın hâlâ mezbûra suâl olunup mûcebi icrâ olunmak matlûbumdur dedikde gıbbe’s-suâl mezbûrân husûs-ı mezbûru bi’l-külliye inkâr ettiklerinden mâ‘adâ müteveffâ-yı mezbûr vefâtından üç gün mukaddem hâl-i hayâtında ve kemâl-i âfiyetinde bizi husûs-ı mezbûra müte‘allika âmme-i da‘vâdan ibrâ ve iskāt dahi etmişidi deyû def‘le mukābele ettiklerinde gıbbe’l-istintâk ve’l-inkâr mezbûrândan sıdk-ı makāline beyyine taleb olundukda yine mahalle-i mezbûrda udûl-i müslimînden Ali Efendi b. Edhem ve Yusuf b. Abdullah nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Ali b. Himmet b. Abdullah vefâtından üç gün mukaddem hâl-i hayâtında ve kemâl-i âfiyetinde mezbûrân Süleyman Ağa ve Mustafa Beşe’yi husûs-ı mezkûra müte‘allika âmme-i da‘vâdan bizim huzûrumuzda ibrâ ve iskāt etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Osman el-İmâm, müezzin Ali Efendi b. Mahmud, Mehmed b. Abdi, Abdülbâkī [b.] Abdullah, Ahmed [b.] Hasan.