İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 425 Hüküm no: 422 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Nikola’nın bakkal dükkânı gediği hissesini Hafız Veliyyüddin Efendi’ye sattığı Bakkāl Âsitâne-i aliyye’de vâki‘ bakkāl tâifesinden Nikola v. Yorgi nâm zimmî meclis-i şer‘-i hatîrde işbu bâ‘isü’l-kitâb Hafız Veliyyüddin Efendi b. Ali muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Bahçekapısı hâricinde Arpacılar sûkunda kâin Yenidükkân denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz üç sehmi diğer Nikola zimmînin ve on sehmi Uzun Kosta zimmînin ve mâ‘adâ yetmiş yedi sehmi dahi akd-i âti’z-zikrin sudûruna değin benim yedimizde mülkümüz olmağla ben gedik-i mezkûrda ber-minvâl-i muharrer mâlik olduğum yetmiş yedi sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ merkūm Hafız Veliyyüddin Efendi’ye dört bin guruşa bey‘ ü temlîk ve lâyıkı vechile teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr dört bin guruşu bana tamâmen def‘ ü teslîm ve ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrun yetmiş yedi sehm hisse-i şâyi‘asında benim aslâ ve kat‘â alâka ve medhalim kalmayıp müşteri-i merkūm Hafız Veliyyüddin Efendi’nin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 13 Za sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Ustabaşı Zaharya, Ligor v. Tanaş, Kabzımâl Sava.