İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 425 Hüküm no: 423 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Kabril’in tütüncü dükkânı gediğini Yorgi’ye sattığı 13000 bin guruşa tütüncü mübâya‘ası Asıl hüccet Galata Mahkemesi’nden fî 3 Şa‘bân sene 1247 İşbu sebt-i hâmiş olunan hüccetde ismi mastûr Tütüncü Kabril v. Toros nâm zimmî meclis-i şer‘-i hatîrde kezâlik hüccet-i mezkûrede mastûrü’l-ism Yorgi v. Lestori nâm zimmî muvâcehesinde ikrâr-ı tâm ve takrîr-i kelâm ben hilâl-i sütûr-ı hüccetde zikr olunan âlât-ı gediği yedimde müstakıllen mülküm olduğuna mebnî mersûm Yorgi zimmîye zimmetimde cihet-i karzdan deynim olan beş bin guruş mukābelesinde târîh-i hüccetde rehin vaz‘ etmek murâd eylediğimde mesfûr Yorgi zimmî râzı olmayıp sûret-i bey‘de takrîr ile ve takrîrin hüccet olsun sen bana deynini edâ eylediğinde muhâlefet etmem yine ben âlât-ı gedik-i mezkûru sana bey‘ ederim demekle ben dahi âlât-ı gedik-i mezkûru mersûm Yorgi zimmîye sûret-i bey‘de takrîr ve takrîrim hüccet olmuş ise de bey‘-i mezkûr muvâza‘a tarîkiyle olup ve benim mersûm Yorgi zimmîye beş bin guruş deynim olmağla ben deynim olan meblağ-ı mezkûru mesfûr Yorgi zimmîye edâ birle âlât-ı gedik-i mezkûrdan keff-i yed ve bana teslîme mersûm Yorgi zimmîye tenbîh olunsun deyü bundan akdem taleb ve da‘vâya tasaddî eylediğimde mersûm Yorgi zimmî dahi benim ber-minvâl-i muharrer da‘vâmı tasdîk ve semeninden alacağını istîfâ etmek üzere âlât-ı gedik-i mezkûrdan keff-i yed eylediğinden sonra âlât-ı gedik-i mezkûr kethüdâ ve tüccârımız ma‘rifetleriyle sûk-ı sultânîde ve mecma‘-ı nâs olan mahallerde bâ-yed-i münâdî beyne’t-tâlibîn lede’l-müzâyede ve gıbbe inkıtâ‘i’r-rağbe on üç bin guruşda yine mersûm Yorgi zimmî üzerinde karâr edip tâlib-i âharları keff-i yed ve meblağ-ı mezkûrun el-yevm semen-i misli idiği dahi bi’l-ihbâr tebeyyün eylediğinden sonra ben âlât-ı gedik-i merkūmu tarafeynden bi’l-îcâb ve’l-kabûl bâtten ve sahîhan bi-safkatin vâhidetin mesfûr Yorgi zimmîye on üç bin guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr on üç bin guruşun sekiz bin guruşunu mersûm Yorgi zimmî mâlından bana def‘ ü teslîm ve ben dahi yedinden ahz u kabz ve bâkī kalan beş bin guruşu dahi benim mersûma zimmetimde deynim olduğunu mukırr u mu‘terif olduğum meblağ-ı mezkûr beş bin guruşa her birimiz bi’t-terâzî takās ve mahsûb edip ol vechile semen-i mezkûru tamâmen ve kâmilen ahz ü istîfâ etmemle fîmâ-ba‘d husûs-ı mezkûra ve mebî‘-i mezkûrun tağrîr ve gabnine <> ve işbu târîh-i hâmişe gelince mersûm Yorgi zimmî ile beynimizde cârî cemî‘ ahz ü i‘tâya müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d âlât-ı gedik-i mezkûrdan benim vechen mine’l-vücûh aslâ ve kat‘â alâka ve medhalim kalmayıp mesfûr Yorgi zimmînin mülk-i müşterâsı ve hakk-ı sırfı olmuşdur ke-emsâlihi mâlik ve mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 Za sene 1247 Şuhûdü’l-hâl: Es-seyyid el-Hâc Mustafa Ağa b. es-Seyyid Ali, Kethüdâ vekîli Ünyeli es-Seyyid Mehmed Ağa, Yazıcı es-Seyyid Mehmed Emin Efendi, Yiğitbaşı Hafız Ahmed, Kethüdâ-i muhzırân İsmail Ağa ve gayruhum.