İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 427 Hüküm no: 424 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirugancı Yuvan’ın şiruganhane gediğindeki hissesini Şirugancı Lazari’ye sattığı Şîrugan hâne Kumkapı’da Âsitâne-i seniyye’de vâki‘ şîrugancı tâifesinden Yuvan v. Pavli nâm zimmî meclis-i şer‘-i hatîrde tâife-i mersûmeden işbu bâ‘isü’s-sifr Lazari v. Endib nâm zimmî muvâcehesinde Sofron v. Ligor nâm zimmî hâzır olduğu hâlde ikrâr ve takrîr-i kelâm edip mahmiye-i mezbûre hısnı ebvâbından Kumkapı dâhilinde Balıkçılar sûkunda tütüncü dükkânı ile menzil beynlerinde kâin bir bâb muhterik şîruganhâne derûnundan müstahlas beyne’l-esnâf gedik ta‘bîr olunur bir çift taş ve iki kantar ve iki terâzî ma‘a derâhim ve dört küp ve bir çift kazgan ve sâir âlât-ı lâzıme-i ma‘lûmenin yüz yirmi sehm i‘tibârıyla altmış sehmi hâzır-ı mersûm Sofron zimmînin ve altmış sehmi akd-i âti’z-zikrin sudûruna değin benim yedimizde iştirâken mülkümüz olmağla ben gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîkim hâzır-ı mersûmun izniyle mesfûr Lazari zimmîye bin sekiz yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin sekiz yüz guruşu müşteri-i mersûm bana tamâmen def‘ ü teslîm ve ben dahi yedinden ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrun altmış sehm hisse-i mezkûresinde benim aslâ ve kat‘â alâka ve medhalim kalmayıp müşteri-i mersûm Lazari zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 8 Za sene 1247 Şuhûdü’l-hâl: Kethüdâ Ali Ağa, Yiğitbaşı Osman Ağa, Muhzır Hüseyin Çelebi. Yuvan v. Praşkova, Sava v. Praşkova, diğer Yako v. Anaştaş.