İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 427 Hüküm no: 425 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Pandeli, Hıristo ve Panayot ile kız kardeşleri Vasiliki’nin bakkal dükkânı gedik hisselerini Bakkal Dimitri’ye sattıkları Bakkāl Âsitâne-i aliyye’de vâki‘ bakkāl tâifesinden Pandeli ve Hıristo ve Panayot nâm zimmîler asâleten ve li-ebeveyn kız karındaşları Vasiliki bt. Tano nâm Nasrâniyenin zevci ve tarafından husûs-ı âti’l-beyânda vekîl-i sâbitü’l-vekâlesi Yorgi v. Aleksi nâm zimmî vekâleten meclis-i şer‘-i hatîrde tâife-i mersûmeden işbu hâmilü’r-rakīm Dimitri v. Yorgi nâm zimmî muvâcehesinde her birileri bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûrede Kocamustafapaşa kurbünde sebîl köşesinde kâin Ali Ağa dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yirmi bir sehm i‘tibârıyla altışar sehmden on sekiz sehmi bizim ve üç sehmi müvekkile-i mesfûrenin akd-i âti’z-zikrin sudûruna değin yedimizde mülkümüz olmağla biz ve müvekkile-i mersûmeden her birimiz gedik-i mezkûrdan ber-minvâl-i muharrer mâlikler olduğumuz hisse-i mezkûrelerimizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Dimitri zimmîye iki bin beş yüz guruşa bi’l-asâle ve bi’l-vekâle bey‘ ü temlîk ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin <> beş yüz guruşu müşteri-i mersûm bize tamâmen def‘ ü teslîm ve biz dahi yedinden ahz u kabz ve bi-kadri’l-hısas iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ-i âm <> ile ibrâ ve iskāt eyledik fîmâ-ba‘d gedik-i mezkûrda bizim aslâ ve kat‘â alâka ve medhalimiz kalmayıp müşteri-i mersûm Dimitri zimmînin mülk-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 13 Za sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı İsak, Ustabaşı Vasil, Kabzımâl Sava, Yazıcı Yani.