İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 428 Hüküm no: 426 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un bakkal dükkânı gedik hissesini Bakkal Polikrapoz’a sattığı Bakkāl Mahrûse-i Galata’ya muzâfe kasaba-i Beşiktaş’da Maçka Sarayı kurbünde sâkine Ümmügülsüm Hatun bt. Süleyman’ın sadrî kebîr oğlu ve tarafından husûs-ı âti’l-beyânda ikrâr ve takrîre vekîl olduğu zâtını ârifân müvekkile-i mezbûrenin li-ebeveyn er karındaşı Yusuf Ağa ve Abdi Ağa b. Mehmed Latif şehâdetleriyle sâbit olan Mehmed Ağa b. Halil meclis-i şer‘-i enverde işbu bâ‘isü’s-sifr Bakkāl Polikrapoz v. Yuvan nâm zimmî muvâcehesinde ikrâr-ı tâm ve takrîr-i kelâm edip vâlidem ve müvekkilem merkūme Ümmügülsüm Hatun İslambol’da Azebler kurbünde Beltaşı nâm mahâlde kâin el-Hâc Musa Ağa dükkânı denmekle meşhûr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi âharın ve altmış sehmi akd-i âti’z-zikrin sudûruna değin benim mülkümüz olmağla ben gedik-i mezkûrdan ber-minvâl-i muharrer mâlike olduğum altmış sehm hisse-i mezkûremi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Polikrapoz zimmîye iki bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin guruşu bana tamâmen def‘ ü teslîm ve ben dahi yedinden ahz u kabz eylediğimden sonra mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda olan hisse-i merkūmda benim aslâ ve kat‘â alâka ve medhalim kalmayıp müşteri-i mersûm Polikrapoz zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 Za sene 1247 Şuhûdü’l-hâl: Eş-şâhidûnü’s-sâbikūn.