İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 430 Hüküm no: 428 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Azmi Efendi’nin evini müştemilatıyla birlikte Müderris Ali Remzi Efendi’ye sattığı Menzil mübâya‘ası Tesvîdden kayd-şüd Husûs-ı meymenet-mahsûs-ı âti’l-beyânın mahâllinde ketb ü tahrîri’çün savb-ı şer‘-i enverden bi’l-iltimâs irsâl olunan Kâtib Mehmed Hamdi Efendi mahmiye-i İstanbul’da Kırkçeşme kurbünde Hüsambey mahallesinde kâin Ahmed Azmi Efendi b. Mehmed’in müsteciren sâkin olduğu menzile varıp zeyl-i kitâbda mektûbü’l-esâmî Müslimîn huzûrlarında akd-i meclis-i şer‘-i kavîm ettikde merkūm Ahmed Azmi Efendi meclis-i ma‘kūd-ı mezkûrda hâlâ Haremeynü’ş-şerifeyn müfettişi müderrisîn-i kirâm-ı zevi’l-ihtirâmdan râfi‘ü hâze’l-kitâbi’l-müstetâb fazîletlü es-Seyyid Ali Remzi Efendi mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin şirâen yedimde mülküm olup mahmiye-i mezbûrede Zincirlikuyu kurbünde Atîkalipaşa mahallesinde vâki‘ bir tarafdan Hattât İsmail Efendi menzili ve bir tarafdan es-Seyyid Ali Efendi zevcesi menzili ve bir tarafdan bostan ve iki tarafdan tarîk-i âm ile mahdûd dâhiliyede tabaka-i ulyâda iki bâb oda ve bir kiler ve bir sofa ve bir âbdesthâne ve kenîf ve vüstâda iki bâb oda ve bir âbdesthâne ve kenîf ve tabaka-i süflâda bir matbah ve iki kiler ve bir mikdâr havlu ve bir bi’r-i mâ ve hâriciyede tabaka-i ulyâda bir kebîr oda ve sofa ve bir kahve odası ve bir kenîf ve âbdesthâne ve bir mâbeyn odası ve bir koğuş ve bir köşk ve bir sagīr oda ve sofa ve kenîf ve âbdesthâne ve tabaka-i süflâda bir oda ve bir ahır ve bir bi’r-i mâ ve bir mahzen ve bir mikdâr bahçe ve bir harâb hamam ve iki sokak kapısını müştemil bir bâb mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile bin dokuz yüz guruşa mûmâ-ileyh es-Seyyid Ali Remzi Efendi’ye bey‘ ü temlîk ve teslîm eylediğimde mûmâ-ileyh dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı merkūm bin dokuz yüz guruşu bana def‘ ü teslîm eylediğinde ben dahi bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını kabûl eyledik fîmâ-ba‘d menzil-i mahdûd-ı mezkûrda benim aslâ ve kat‘â alâka ve medhalim kalmayıp mûmâ-ileyh es-Seyyid Ali Remzi Efendi’nin mülk-i müşterâsı ve hakk-ı sırfı olmuşdur makrûnen bi’l-âfiye mâlik ve mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu] Fî 15 Şa‘bân sene 1247 Şuhûdü’l-hâl: Hasan Ağa b. İbrahim, İbrahim Ağa b. Mustafa, Ömer Ağa b. Osman, Mektûbî kalemi ketebesinden Ahmed Kâmil Efendi, Hasekiden muhrec Yakub Ağa.