İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 431 Hüküm no: 429 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Andon’un gediğini Tütüncü Vasil’e sattığı Tütüncü mübâya‘ası Mahrûse-i Galata’ya muzâfe İstinye nâhiyesine tâbi‘ Arnavud karyesi mütemekkinlerinden ve tütüncü tâifesinden Andon v. el-hâlik Tohari nâm zimmî meclis-i şer‘-i hatîrde karye-i mezkûre mutavattınlarından ve tâife-i mersûmeden işbu hâmilü’r-rakīm Vasil v. Enorya nâm zimmî muvâcehesinde ikrâr-ı tâm ve takrîr-i kelâm edip İstanbul’da Duhân Gümrüğü kurbünde Yağcılar sokağında Geredeli Halil Ağa ve el-Hâc Mahmud Ağa mağazaları beynlerinde kâin Ma‘den kaleminde babam hâlik-i mersûm Tohari ismine mukayyed ve mu‘teber şehriye on buçuk guruş kirâ-i kadîmeli bir bâb kârgir tütüncü mağazası derûnunda mevcûde beyne’l-esnâf gedik ta‘bîr olunur bir peşkûn ve beş billûr kâse ve iki hûni ve bir terâzî ma‘a derâhim ve bir kantar ve sâir âlât-ı lâzıme-i ma‘lûme akd-i âti’z-zikrin sudûruna değin benim yedimde müstakıllen mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Vasil zimmîye altı bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr altı bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Vasil zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî-selhi Zilka‘de sene 1247 Şuhûdü’l-hâl: Kethüdâ Mustafa Kâşif Ağa, Vekîli Ünyeli Mehmed Ağa, Yazıcı Mehmed Efendi, Yiğitbaşı Hafız Ahmed Ağa.