İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 432 Hüküm no: 430 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Zengin Osman Ağa’nın tütüncü dükkânı gediğini Tütüncü Yako’ya sattığı Tütüncü mübâya‘ası Âsitâne-i seniyye’de vâki‘ tütüncü esnâfından Zengin Osman Ağa b. Ali nâm kimesne meclis-i şer‘-i münîrde esnâf-ı merkūmeden işbu bâ‘isü’s-sifr Yako v. Kanorta nâm Yahûdi muvâcehesinde ikrâr-ı tâm ve takrîr-i kelâm edip mahmiye-i mezbûrede Duhân Gümrüğü kurbünde Yağcılar sûku başında kâin ma‘lûmü’l-hudûd mâhiye on iki buçuk guruş kirâ-i kadîmeli ve doğrama zâr ile ifrâz ve imtiyâz kılınmış bir bâb tütüncü mağazası derûnunda mevcûde Ma‘den kaleminde kendi ismime mukayyed beyne’l-esnâf gedik ta‘bîr olunur bir peşkûn ve bir terâzî ma‘a derâhim ve bir kantar ve bir akçe tahtası [79b] ve sâir âlât-ı lâzıme-i ma‘lûme akd-i âti’z-zikrin sudûruna değin bâ-sûret yedimde mülküm olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Yako Yahûdiye on bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr on bin guruşu bana mâlından tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz eylediğimden sonra mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp mersûm Yako Yahûdinin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî-selhi Za sene 1247 Şuhûdü’l-hâl: Eş-şâhidûnü’s-sâbikūn.