İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 433 Hüküm no: 431 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Hıristo’nun bakkal gediği dükkânındaki altmış sehm hissesinin eşit şekilde Bakkal Yorgi ve Bakkal Dimitri’ye sattığı Bakkāl mübâya‘ası Âsitâne-i aliyye’de vâki‘ bakkāl tâifesinden Hıristo v. Angeli nâm zimmî meclis-i şer‘-i hatîrde tâife-i mersûmeden işbu bâ‘isü’s-sifr Yorgi v. Anaştaş ve Dimitri v. Hıristo nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Bâb-ı Caferiye dâhilinde vâki‘ Derviş Ağa dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Praşkova ve otuz sehmi Hıristofor zimmîlerin ve mâ‘adâ altmış sehmi dahi akd-i âti’z-zikrin sudûruna değin benim yedimizde mülkümüz olmağla ben gedik-i mezkûrdan ber-minvâl-i muharrer mâlik olduğum altmış sehm hissemin otuz sehmini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûrândan mersûm Yorgi zimmîye iki bin sekiz yüz yetmiş beş guruşa ve otuz sehmini dahi mersûm Dimitri zimmîye kezâlik iki bin sekiz yüz yetmiş beş guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eyledikden sonra semenleri olan cem‘an beş bin yedi yüz elli guruşu müşteriyân-ı mersûmân yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm gedik-i mezkûrun hisse-i mezkûresinde benim aslâ ve kat‘â alâka ve medhalim kalmayıp müşteriyân-ı mersûmân Yorgi ve Dimitri zimmîlerin mülk-i müşterâları ve hakk-ı sırfları olmuşdur dedikde gıbbe’t-tasâduki’ş-şer‘î mâ-vaka‘a bi’t-taleb ketb ü imlâ olundu. Fî 29 Za sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Anaştaş v. İlya, Ligori v. Kiryako, Çavuş Kostandi v. Elmeye.