İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 433 Hüküm no: 432 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve Bilâd-ı Selâse sabuncu esnafı kethüdalığına Ali Ağa’nın tayin edildiği Kethüdâ nasbı Âsitâne-i aliyye ve Bilâd-ı Selâse’de vâki‘ sabuncu esnâfının kethüdâları olan Mehmed Reşid Efendi bu def‘a bi’l-iktizâ âhar hizmete memûr olduğuna binâen kedhüdâlık-ı mezkûrdan keff-i yed birle esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâslarıyla ve hâlâ muhtesib-i İstanbul sa‘âdetlü Mehmed Emin Faik Efendi’nin re’yi munzam idiği tarafından mürsel çukadârı Süleyman Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb es-Seyyid Ali Ağa b. es-Seyyid Ali nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā sebt ü imlâ olundu. Fî 29 Za sene 1247 Şuhûdü’l-hâl: es-Seyyid Ali b. es-Seyyid Ömer, es-Seyyid el-Hâc Mustafa b. es-Seyyid Abdurrahman, es-Seyyid Hasan b. Hüseyin, es-Seyyid Osman b. es-Seyyid Ömer, Yiğitbaşı Mehmed b. Hasan ve gayruhum.