İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 442 Hüküm no: 442 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Bakkalı Lefter’in varislerinden bazılarının yağcı bakkalı gediği hisselerinden bir kısmını birbirilerine sattıkları Bâb-ı Caferiye’de yağcı bakkālı Havâss-ı refî‘a kazâsına muzâfe Silivri nâhiyesine tâbi‘ Bigados karyesinde mütemekkin iken bundan akdem hâlik olan Yağcı Bakkālı Lefter v. Kosti zimmînin verâseti zevce-i metrûkesi Efendo bt. Pali nâm Nasrâniye ile sulbî kebîr oğulları Kosti ve Yorgi ve Togodoş ve Vasil zimmîler ve sulbiye kebîre kızları Faniçe ve Tarşiçe ve Zoviçe Nasrâniyelere münhasıra olduğu bi’l-ihbâr zâhir ve mütehakkık oldukdan sonra verese-i mersûmûndan kendi nefsinden asıl ve anası zevce-i mersûme Efendo Nasrâniye ve kız karındaşları benât-ı mesfûrât Faniçe ve Tarşiçe ve Zoviçe Nasrâniyeler ve li-ebeveyn er karındaşı ibn-i mersûm Vasil zimmî taraflarından husûs-ı âti’l-beyânda vekîlleri olduğu eşhâs-ı mesfûrâtı bilir Bakkāl Vasil v. Yorgi ve Bakkāl Dimitri v. Anaştaş nâm zimmîler şehâdetleriyle sâbit olan ibn-i mersûm Togodoş zimmî meclis-i şer‘-i hatîrde li-ebeveyn er karındaşları işbu bâ‘iseyü’s-sifr mersûmân Kosti ve Yorgi nâm zimmîler muvâcehelerinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Bâb-ı Caferiye dâhilinde kâin Yusuf Ağa dükkânı denmekle arîf bir bâb yağcı bakkāl dükkânı ve dükkân-ı mezkûra merbût karşısında kâin bir bâb kârgir mahzen ile Sa‘lebci sokağında vâki‘ diğer bir bâb kârgir mağaza derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla otuzar sehmi Bakkāl Tohari zimmînin ve dokuzar buçuk sehm birer buçuk pul hisseleri Susana Nasrâniyenin ve sekizer buçuk sehm ikişer pul hisseleri mersûmândan mersûm Yorgi zimmînin ve mâ‘adâ altmış birer sehm yarımşar pul hisseleri dahi babamız ve mûrisimiz hâlik-i mersûmun sağlığında yedinde mülkü olup ba‘de helâkihi tashîh meselemiz üzere sekiz buçuk sehm birer buçuk pul hisseleri anam ve müvekkilem zevce-i mersûme Efendo Nasrâniyeye ve beşer sehm üçer pul hisseden cem‘an on yedişer sehm birer pul hisseleri kız karındaşlarım ve müvekkilelerim mersûmât Faniçe ve Tarşiçe ve Zoviçe Nasrâniyelere ve on birer sehm birer pul hisselerden yirmi ikişer buçuk sehmi benimle er karındaşım ve müvekkilim mersûm Vasil zimmîye ve kezâlik on birer sehm birer pul hisselerden yirmi ikişer buçuk sehmi karındaşlarımız mesfûrân Kosti ve Yorgi zimmîlere mevrûs olup ol vechile yedimizde şâyi‘an mülkümüz olmağla gedikhâ-i mezkûrelerden ben ve er karındaşım ve müvekkilim mersûm Vasil zimmîden her birimiz mâlik olduğumuz yirmi ikişer buçuk sehm hisselerimizin onar sehminden yirmişer sehmini yedimizde ibkā ve mâ‘adâ ikişer buçuk sehm hisselerimiz ile anam ve müvekkilem mersûmenin mâlike olduğu sekiz buçuk sehm birer buçuk pul hissesiyle kız karındaşlarım ve müvekkilelerim mersûmâtın ber-vech-i muharrer mâlikeler oldukları cem‘an on yedişer sehm birer pul hisseleri ki min-haysü’l-mecmû‘ yirmi sekizer buçuk sehm yarımşar pul hisselerden on sekizer sehm üçer buçuk pul hisselerini karındaşlarım mersûmândan mersûm Kosti zimmîye ve dokuzar sehm üçer pul hisselerini mersûm Yorgi zimmîye tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile üç bin yedi yüz elli guruşa bi’l-asâle ve bi’l-vekâle bey‘ ü temlîk ve her birini vech-i lâyıkı üzere teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl ve semen-i mezkûr üç bin yedi yüz elli guruşu bana tamâmen def‘ ü teslîm ve ben dahi yedlerinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d âlât-ı gedikhâ-i mezkûrelerin hisse-i şâyi‘alarında benim ve anam ve er ve kız karındaşlarım mesfûrûnun aslâ ve kat‘â alâka ve medhallerimiz kalmamağla gedikhâ-i mezkûrelerden ber-i‘tibâr-ı merkūm on birer sehm birer pul hisseleri babasından irsen ve on sekizer sehm üçer buçuk pul hisseleri şirâen ki cem‘an otuzar sehm yarımşar pul hisseleri mersûm Kosti zimmînin ve kezâlik on birer sehm birer pul hisseleri babasından irsen ve dokuzar sehm üçer pul hissesi bu def‘a ve sekizer buçuk sehm ikişer pul hisseleri mukaddemâ şirâen ki cem‘an otuzar sehmi mersûm Yorgi zimmînin ve onar sehmi karındaşım ve müvekkilim Vasil zimmînin ve onar sehmi dahi benim yedimizde irsen ve şirâen mülkümüz olmuşdur dedikde gıbbe’t-tasâduki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-şehri Rebî‘i’l-âhir li-sene seb‘a ve erba‘în ve mi’eteyn ve elf. Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Kethüdâ-i muhzırân Hafız İsmail Ağa. Ustabaşı Ananosti, Ustabaşı İsak, Bakkāl Kiryako, Bakkāl Dimitri v. Varsemi