İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 444 Hüküm no: 443 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yorgaki’nin bakkal dükkânı gediğindeki hissesini oğulları Dimitri ve Zahari’ye sattığı Langa-i Sagīr kasabbaşı dükkânı Bakkāl Âsitâne-i aliyye’de vâki‘ bakkāl tâifesinden Yorgaki v. Hıristo nâm zimmî meclis-i şer‘-i hatîrde tâife-i mersûmeden olup mersûm Yorgaki zimmînin sulbî kebîr oğulları işbu hâmilü’r-rakīm Dimitri ve Zahari nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûrede Langa-i sagīr kurbünde Akarçeşme karşısında kâin Kasabbaşı dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla on üç sehmi işbu hâzır bi’l-meclis Kostandi v. Esteryo zimmînin ve yirmi altı sehmi oğullarım mersûmânın ve bâkī seksen bir sehmi dahi akd-i âti’z-zikrin sudûruna değin benim bâ-hüccet yedimizde şâyi‘an mülkümüz olmağla gedik-i mezkûrdan ben ber-vech-i muharrer mâlik olduğum seksen bir sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile oğullarım mersûmâna bin guruşa ale’l-iştirâki’s-seviyy bey‘ ü temlîk ve lâyıkı vechile teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr bin guruşu oğullarım mersûmân bana tamâmen def‘ ü teslîm ve ben dahi yedlerinden tamâmen ve kâmilen ahz u kabz eyledim fîmâ-ba‘d hisse-i gedik-i mezkûrda benim aslâ ve kat‘â alâka ve medhalim kalmayıp oğullarım müşteriyân-ı mersûmân Dimitri ve Zahari zimmîlerin mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 şehri Rebî‘ülevvel sene 1247 Şuhûdü’l-hâl: Eş-şâhidûnü’s-sâbikūn.