İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 446 Hüküm no: 446 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğancı Mehmed Ağa’nın varislerinin, Hasan Bey’le soğancı dükkânı ticaretinden olan miras hisselerini teslim alıp zimmet ibrası yaptıkları Soğancı ibrâsı Mahmiye-i İslambol’da Çırçır kurbünde Molla Zeyrek mahallesi ahâlîsinden ve Odunkapısı hâricinde vâki‘ soğancı esnâfından olup Mekke-i mükerreme-kerremaha’llâhu ilâ-yevmi’l-kıyâme-de mücâviren sâkin iken bin iki yüz kırk altı senesi şehr-i Ramazani’l-mübâreki’nde vefât eden el-Hâc Mehmed Ağa b. Ahmed b. Hasan’ın verâseti Mekke-i mükerreme’de sâkine zevcesi Hacce Kerime Hatun ile İstanbul’da sâkinler sulbiye kebîre kızı Hasibe ve li-ebeveyn er karındaşı Hasan Bey ve li-ebeveyn kız karındaşları Âişe ve Havva’ya münhasıra ve mesele-i mîrâsları otuz iki sehmden olup sihâm-ı mezbûreden dört sehmi zevce-i mezbûreye ve on altı sehmi bint-i merkūmeye ve altı sehmi ah-ı merkūm Hasan Bey’e ve üçer sehmden altı sehmi uhtân-ı merkūmetân Âişe ve Havva’ya isâbeti tahakkukundan sonra verese-i mezbûrûndan bint-i merkūme Hasibe ve uhtân-ı merkūmetân Âişe ve Havva hatunlardan merkūme Hasibe’nin zevci ve taraflarından husûs-ı âti’l-beyânda vekîlleri olduğu zâtlarını ârifân es-Seyyid el-Hâc Osman Ağa b. Ali ve Hafız Mehmed Ağa b. Ahmed nâm şâhideyn-i mu‘addileyn şehâdetleriyle sâbit olan Soğancı Ali Ağa b. Mehmed meclis-i şer‘-i şerîf-i enverde işbu bâ‘isü’l-kitâb merkūm Hasan Bey mahzarında bi’l-vekâle ikrâr-ı tâm ve takrîr-i kelâm edip [82b] müteveffâ-yı merkūm el-Hâc Mehmed Ağa hayatında karındaşı merkūm Hasan Bey ile mârru’z-zikr Odunkapısı hâricinde Kabasakal dükkânı ittisâlinde kâin Sarı Osman dükkânı denmekle şehîr bir bâb soğancı dükkânının gediğinde ve dükkân-ı mezkûrun ticâretinde vefâtına değin müddet-i ma‘lûmeden beri şerîkler <> olmak mülâbesesiyle işbu târîh-i vesîkadan bir ay mukaddem müddet-i mezkûrede beynlerinde cereyân eden ahz ü i‘tâlarının hesâblarını esnâfımız ma‘rifetleriyle yegān yegān sahîhan rü’yet eylediğimizde müteveffâ-yı merkūmun karındaşı ve şerîki mezbûr Hasan Bey zimmetinde gerek re’s-i mâl ve gerek fâide-i hâsıladan zuhûr eden ma‘lûmü’l-mikdârdan tashîh meseleleri üzere zevcem ve müvekkilem merkūmenin hisse-i irsiyesi ve alacağı olan sekiz bin beş yüz guruş ve kız karındaşları müvekkilelerim mezbûretânın hisselerine isâbet eden ikişer bin guruşdan cem‘an dört bin guruş ki min-haysü’l-mecmû‘ on iki bin beş yüz guruşu merkūm Hasan Bey bana tamâmen def‘ ü teslîm ben dahi yedinden bi’l-vekâle ahz u kabz edip fîmâ-ba‘d dükkân-ı mezkûrun gediğinden mâ‘adâ bi’l-cümle mîrâs ve şirket husûslarına ve hesâb-ı mezkûrda galat vukū‘ına ve târîh-i kitâba gelince beynlerinde cârî ahz ü i‘tâ ve mu‘âmelât-ı şettâya <> ve sâir ma‘lûm ve mechûl cemî‘ hukūk-ı şer‘iyyeye müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-minvâl-i meşrûh âharın ibrâsını asâleten ve vekâleten kabûl eyledik dedikde mukırr-ı vekîl-i merkūm Ali Ağa’yı bi’l-vekâle sâdır olan cemî‘ kelimât-ı meşrûhasında merkūm Hasan Bey vicâhen tahkīk ve şifâhen tasdîk etmeğin mâ-vaka‘a [bi’t-taleb ketb olundu] Fî 19 Z sene 1247 Şuhûdü’l-hâl: Kethüdâ Ömer Ağa, Şişman Hasan Ağa, Mütevellî Mustafa Ağa, Kara Hafız Ahmed Ağa, el-Hâc Hasan Ağa, Yiğitbaşı Hasan Ağa, Kavaklızâde Hafız Mehmed Ağa.