İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 448 Hüküm no: 447 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zekiye Hanım’ın muhalaa yoluyla kocası Hasan Efendi’den boşandığı Husûs ile muhâla‘a Husûs-ı âti’l-beyânın mahâllinde ketb ü tahrîri’çün cânib-i şerî‘at-i garrâdan bi’l-iltimâs me’zûnen irsâl olunan Kâtib es-Seyyid Ahmed Rıza Efendi mahmiye-i İstanbul’da Şeyh Ebulvefâ kurbünde Sarı Bayezid mahallesinde vâki‘ ricâl-i Devlet-i aliyye’den merhûm Hüsnü Beyefendi halîlesi denmekle arîfe iffetlü nezâhetlü Zekiye Hanım bt. el-mevle’l-merhûm el-Hâc Abdülkerim Efendi’nin konağına varıp huzûr-ı Müslimînde akd-i meclis-i şer‘-i nebevî ettikde mûmâ-ileyhâ Zekiye Hanım tarafından ber-vech-i âtî hul‘ ve ibrâya vekîl olduğu zât-ı mûmâ-ileyhâyı bi’l-mu‘arrefetü’ş-şer‘iyye ârifân Rumeli kuzâtı eşrâfından el-Hâc Mustafa Efendi b. Hasan ve İbrahim Ağa b. Osman nâm kimesneler şehâdetleriyle ber-nehc-i şer‘î sâbit olan mu‘arrefetü’z-zât Şerife Nefise bt. es-Seyyid İbrahim nâm hatun meclis-i ma‘kūd-ı mezkûrda müvekkile-i mûmâ-ileyhânın zevc-i muhâlı‘ı hâcegân-ı Dîvân-ı hümâyûn’dan bâ‘isü hâze’l-kitâb es-Seyyid Hasan Efendi b. es-Seyyid Ali mahzarında bi’l-vekâle ikrâr-ı tâm ve takrîr-i kelâm edip mûmâ-ileyh es-Seyyid Hasan Efendi müvekkilem mûmâ-ileyhâ Zekiye Hanım’ın bin beş yüz guruş mehr-i mu‘accel-i müstevfâ ve üç bin guruş mehr-i müeccel tesmiyeleriyle zevc-i dâhili olup beynlerinde hüsn-i mu‘âşeretleri olmamağla mehr-i müeccel-i mezkûr üç bin guruş ile nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere müvekkilem mûmâ-ileyhâya izâfetle mûmâ-ileyh es-Seyyid Hasan Efendi ile bi’l-vekâle hul‘ olduğumuzda ol dahi hul‘-ı mezkûru ba‘de’l-kabûl hukūk-ı zevciyyete ve ibtidâ-i zevciyyetden işbu târîh-i vesîkaya gelince sâir cemî‘ hukūk-ı şer‘iyyeye müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-minvâl-i muharrer âharın asâleten ve vekâleten ibrâsını kabûl eyledik dedikde gıbbe’t-tasdîki’ş-şer‘î vâki‘ hâli kâtib-i mûmâ-ileyh mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu] Fî 12 Muharremi’l-harâm sene 1247 Hâcegândan sâbık Anadolu muhâsebecisi es-Seyyid Mehmed Esad Efendi b. Mehmed Nureddin, <>, <>, <>, <<Çukadâr Mehmed Ağa b. Hasan>>, <>, işbu şuhûd-ı hamse sehven yazılıp darb-şüd, Dergâh-ı mu‘allâ kapıcıbaşılarından Mehmed Sadık Bey b. el-Hâc Mustafa, Duhân tüccârından Mısırlı Mehmed Ağa b. Mustafa, Mahalle-i mezbûre imâm vekîli el-Hâc Ali Efendi b. Süleyman, Muhzır Molla Halil b. İbrahim ve gayruhum.