İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 449 Hüküm no: 448 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeş Kirkor ile Tıngıroğlu Oseb’in mağaza gediği hisselerini Drohi ve Biricik’e sattıkları Galata’da Havyarcıhan’da (Çorbacıhan’da) mağaza mübâya‘ası Mahrûse-i Galata hâricinde Beyoğlu nâm mahâlde mütemekkin Simkeş Kirkor v. Avanis nâm zimmî mahrûse-i mezkûreye muzâfe İstinye nâhiyesine tâbi‘ Yeniköy nâm karye mütemekkinlerinden Tıngıroğlu Oseb v. diğer Avanis zimmînin sulbî kebîr oğlu ve tarafından husûs-ı âti’l-beyânda vekîl olduğu âhar Kirkor v. Bedros v. başka Oseb nâm zimmîler şehâdetleriyle sâbit olan Avanis nâm zimmî hâzır olduğu hâlde meclis-i şer‘-i hatîr-i lâzımü’t-tevkīrde işbu bâ‘isü’r-rakīm Drohi bt. Andon ve sadriye kebîre kızı Biricik bt. Agop nâm Nasrâniyelerden mersûme Drohi Nasrâniyenin güveyi ve mersûme Biricik Nasrâniye zevci ve taraflarından husûs-ı câ’i’z-zikrde tasdîka vekîlleri David oğlu Oseb v. Arutin nâm zimmî muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip mahrûse-i mezkûre hısnı ebvâbından Karaki Kapısı dâhilinde kâin Çorbacıhanı derûnunda hîn-i duhûlünde cânib-i şimâlde İngiliz Yuvan ve Ekmekçibaşı Artin zimmî mağazaları beynlerinde kâin dördüncü bir bâb tüccâr mağazası derûnunda mevcûde âlât-ı gedik benim ve müvekkil-i mersûm Oseb zimmînin bâ-mülknâme-i hümâyûn akd-i âti’z-zikrin sudûruna değin ale’l-iştirâk yedimizde mülkümüz olmağla biz âlât-ı gedik-i mezkûru tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkiletân-ı mersûmetân Drohi ve Biricik Nasrâniyelere kırk bin guruşa bi’l-asâle ve bi’l-vekâle bey‘ ü temlîk ve teslîm eylediğimizde onlar dahi ber-vech-i meşrûh iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr kırk bin guruşu mâllarından bize tamâmen def‘ ü teslîm ve biz dahi yedlerinden kâmilen bi’l-asâle ve bi’l-vekâle ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-minvâl-i meşrûh âharın ibrâsını asâleten ve vekâleten kabûl eyledik fîmâ-ba‘d âlât-ı gedik-i mezkûrda mersûm Kirkor zimmî benim ve vekîl-i hâzır-ı mesfûr Avanis zimmî dahi babam ve müvekkilim mersûm Oseb zimmînin aslâ ve kat‘â alâka ve medhalimiz [83a] kalmayıp müvekkiletân-ı mesfûretân Drohi ve Biricik Nasrâniyelerin mülk-i müşterâları ve hakk-ı sırfları olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 Z sene 1247 Şuhûdü’l-hâl: Kahveci el-Hâc Selim Ağa, Hüseyin b. Yusuf, Ali Ağa b. el-Hâc Mehmed tâbi‘-i Serduhân Mehmed Ağa, Kapıçukadârı Mehmed Emin Ağa. Kuyumcu Bilezikçioğlu Bogos v. Artin, Kılcıoğlu Kirkor v. Andon, Ayıloğlu Andon, Kirkor v. Bedros.