İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 450 Hüküm no: 449 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi ile kız kardeşleri Feryana, Kiryaki ve Sultane’nin bakkal gediğindeki hisselerini Bakkal Yorgi ve Kostandi’ye sattıkları Nüshateyn Bakkāl Kadır[ga] limanında Vilâyet-i Anadolu’da Mihaliç kasabasında mütemekkineler Yorgi v. Yani nâm zimmî ile li-ebeveyn kız karındaşları Feryana ve Kiryaki ve Sultane Nasrâniyelerden mersûme Kiryaki Nasrâniyenin zevci ve taraflarından husûs-ı âti’l-beyânda vekîlleri olduğu eşhâs-ı mersûmâtı bilir Dimo v. Yorgaki ve Panayot v. Andon nâm zimmîler şehâdetleriyle sâbit olan Panayot v. Tarandafil nâm zimmî meclis-i şer‘-i hatîrde bakkāl tâifesinden işbu bâ‘isiyyü’s-sifr Yorgi ve Kostandi veled[ey] Hıristo nâm zimmîler muvâcehelerinde ikrâr-ı tâm ve takrîr-i kelâm edip İstanbul’da Kadırga limanı kurbünde Payzen hanı <> altında kâin el-Hâc İbrahim Ağa dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme ile civârında kâin Ali Ağa dükkânı denmekle ma‘rûf muhterik bir bâb bakkāl dükkânında müstahlas yedimde mevcûd âlât-ı lâzıme-i ma‘lûmenin her biri yüz yirmişer sehm i‘tibârıyla kırkar sehmi mersûmân Yorgaki ve Kostandi zimmîlerin ve kırkar sehmi diğer Kostandi zimmînin ve dörder sehmi İspiro zimmînin ve otuz altışar sehmi müvekkilelerim mersûmûnun yedlerinde şâyi‘an mülkleri olmağla ben akd-i âti’z-zikrin sudûruna değin müvekkillerim mesfûrûnun mâlikler oldukları mârru’z-zikr otuz altışar sehm hisse-i şâyi‘alarını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûmân Yorgi ve Kostandi zimmîlere üç bin beş yüz guruşa bi’l-vekâle bey‘ ü temlîk ve vech-i lâyıkı üzere teslîm eylediğimde onlar dahi ber-vech-i meşrûh iştirâ ve temellük ve tesellüm ve kabz ve kabûl ve semeni olan meblağ-ı mezkûr üç bin <> beş yüz guruşu mâllarından bana def‘ ü teslîm ve ben dahi yedlerinden ahz u kabz edip mebî‘-i mezkûrların tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ-i âm ile ibrâ ve iskāt etmemizle fîmâ-ba‘d zikirleri mürûr eden gediklerin hisse-i şâyi‘a-i mezkûrelerinde müvekkillerim mesfûrûnun aslâ ve kat‘â alâka ve medhalleri kalmayıp müşteriyân-ı mersûmân Yorgi ve Kostandi zimmîlerin mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 7 şehri Rebî‘ülevvel sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Ananosti, Ustabaşı İsak, Kabzımâl Yani, Yazıcı Hıristo.