İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 451 Hüküm no: 450 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal İstavri’nin sahibi olduğu bakkal dükkânı gediği için hüccet verilmesi Bakkāl ihbârı Mahmiye-i İstanbul’da Samatya kurbünde Mirahur mahallesinde mütemekkin bakkāl tâifesinden İstavri v. Yuvan v. Polihron nâm zimmî tarafından husûs-ı âti’l-beyânda vekîl olduğu Bakkāl Nikoli v. Yani ve Yani v. Kosta nâm zimmîler şehâdetleriyle sâbit olan Bakkāl Togodoş v. Gavril nâm zimmî meclis-i şer‘-i hatîrde bi’l-vekâle takrîr-i kelâm ve ta‘bîr ani’l-merâm edip mahalle-i mezkûrede kâin Mehmed Çelebi dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme yüz yirmi sehm i‘tibârıyla üç kıt‘a temessük mantûklarınca müvekkilim mersûmun müstakıllen yedinde mülkü olup lâkin âlât-ı gedik-i mezkûr müvekkilim mersûmun ber-minvâl-i muharrer mülkü olduğunu nâtıka yedinde hücceti olmamağla husûs-ı mezkûre esnâf-ı merkūmeden vukūf ve ıttılâ‘ları olan kimesnelerden istihbâr olunup kıbel-i şer‘den müvekkilim mersûmun yedine bir kıt‘a hüccet i‘tâ olunmak bi’l-vekâle murâdımdır dedikde fi’l-hakīka gedik-i mezkûr müvekkil-i mersûm İstavri zimmînin ber-minvâl-i muharrer müstakıllen yedinde mülkü olduğunu esnâf-ı merkūmeden zeyl-i vesîkada muharrerü’l-esâmî kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka bi’t-taleb ketb ü imlâ olundu. Fî 3 Rebî‘ülevvel sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı Ananosti, Ustabaşı Zahari, Kabzımâl Yani, Yazıcı Hıristofor.