İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 451 Hüküm no: 451 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zoviçe’nin bakkal dükkânı gediğindeki hissesini Bakkal Dimitri’ye sattığı Bakkāl Çatladıkapı’da Vilâyet-i Rumeli’de Yenişehir-i Fener kazâsına tâbi‘ Rendine karyesinde mütemekkine Zoviçe bt. Yani nâm Nasrâniyenin yeğeni ve tarafından husûs-ı âti’z-zikrde vekîl olduğu şahsını bilir Dimitri v. Yorgi ve Yani v. diğer Yorgi nâm zimmîler şehâdetleriyle sâbit olan Kostandi v. Esteryo nâm zimmî meclis-i şer‘-i hatîrde bakkāl tâifesinden işbu bâ‘isü’s-sifr Dimitri v. Menet nâm zimmî muvâcehesinde bi’l-vekâle ikrâr-ı tâm ve takrîr-i kelâm edip İstanbul hısnı ebvâbından Çatladıkapı dâhilinde kâin Cebeci Mehmed dükkânı denmekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla seksen sehmi hâlik Aci Eftat zimmî veresesinin ve on üç buçuk sehmi Done Nasrâniyenin ve altı buçuk sehmi mersûm Dimitri zimmînin ve yirmi sehmi müvekkilem mersûmenin yedlerinde mülkleri olmağla akd-i âti’z-zikrin sudûruna değin müvekkilem mersûmenin ber-minvâl-i meşrûh mâlike olduğu yirmi sehm hisse-i şâyi‘asını ben tarafeynden îcâb ve kabûlü hâvî şürût-ı müfside [83b] ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Dimitri zimmîye iki bin beş yüz guruşa bi’l-vekâle bey‘ ü temlîk ve lâyıkı vechile teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin beş yüz guruşu bana def‘ ü teslîm ve ben dahi yedinden bi’l-vekâle tamâmen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrun hisse-i mezkûresinde müvekkilem mersûmenin aslâ ve kat‘â alâka ve medhali kalmayıp müşteri-i mersûm Dimitri zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 şehri Rebî‘ülevvel sene [1]247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı Ananosti, Ustabaşı Mai, Ustabaşı Kiryako, Ustabaşı Zahari.