İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 453 Hüküm no: 453 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yorgi ile kardeşi Yani’nin bakkal dükkânı gedik hisselerini Bakkal Kiryako’ya sattıkları Bakkāl Âsitâne-i aliyye’de vâki‘ bakkāl tâifesinden olup kendi nefsinden asıl ve li-ebeveyn er karındaşı Yani v. Kostandi nâm zimmî tarafından husûs-ı âti’l-beyânda vekîl olduğu Bakkāl Dimitri v. Varsemi ve Bakkāl Yorgi ve Fugo nâm zimmîler şehâdetleriyle sâbit olan Dimitri nâm zimmî meclis-i şer‘-i hatîrde tâife-i mersûmeden işbu hâmilü’r-rakīm Kiryako v. Kosta nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûrede Avratpazarı kurbünde Hobyar mahallesinde kâin Mısırlıoğlu dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla elli dört <> buçuk sehmi Harizma zimmînin ve bâkī altmış beş buçuk sehmi dahi akd-i âti’z-zikrin sudûruna değin benimle karındaşım ve müvekkilim mersûmun yedimizde irsen mülkümüz olmağla gedik-i mezkûrdan ben ve karındaşım müvekkilim mersûmun ber-vech-i muharrer mâlikler olduğumuz altmış beş buçuk sehm hisse-i şâyi‘amızı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide <> ve şerîkimizin izniyle mersûm Kiryako zimmîye beş bin iki yüz elli guruşa bi’l-asâle bi’l-vekâle bey‘ ü temlîk ve lâyıkı vechile teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr beş bin iki yüz elli <> guruşu mersûm Kiryako zimmî bana tamâmen def‘ ü teslîm ve ben dahi yedinden bi’l-asâle ve bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm hisse-i mezkûrede benim ve karındaşım ve müvekkilim mersûmun aslâ ve kat‘â alâka ve medhallerimiz kalmayıp müşteri-i mersûm Kiryako zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 19 Z sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Ananosti v. Hıristo, Ustabaşı İsak v. Kiryako, Bakkāl Dimitri v. Yani.