İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 454 Hüküm no: 454 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri ile kardeşleri Despino ve Kosti’nin bakkal dükkânı gedik hisselerini Bakkal Kiryako’ya sattıkları Bakkāl Mahmiye-i İstanbul hısnı ebvâbından Topkapısı dâhilinde Bayezidağa mahallesinde mütemekkinler kendi nefsinden asıl ve li-ebeveyn kız karındaşı Despino Nasrâniye ile li-ebeveyn er karındaşı Kosti veledey el-hâlik Yani zimmî taraflarından husûs-ı âti’l-beyânda vekîlleri olduğu şahs-ı mersûmeyi ârifân Bakkālân bölükbaşısı Abdi Çelebi b. Mehmed ile Bakkāl Dimitri v. Anaştaş zimmî şehâdetleriyle sâbit olan Bakkāl Dimitri nâm zimmî meclis-i şer‘-i hatîrde bakkāl tâifesinden işbu hâmilü’r-rakīm Kiryako v. Kosta nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûrede Yenibahçe kurbünde Nakkaşpaşa’da kâin Hacı Yusuf dükkânı denmekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Ustabaşı Ananosti zimmînin ve otuz sehmi Yani zimmînin ve bâkī altmış sehmi dahi akd-i âti’z-zikrin sudûruna değin benimle er ve kız karındaşlarım mesfûrânın yedlerimizde irsen ve şirâen mülkümüz olmağla gedik-i mezkûrdan ben ve karındaşlarım müvekkilân-ı mersûmânın ber-vech-i muharrer mâlikler olduğumuz altmış sehm hisse-i şâyi‘amızı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şürekâmız izinleriyle mersûm Kiryako zimmîye beş yüz elli guruşa bi’l-asâle bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr beş yüz elli guruşu mersûm Kiryako zimmî bana tamâmen def‘ ü teslîm ve ben dahi yedinden bi’l-asâle ve bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d hisse-i mezkûrede benimle er ve kız karındaşlarım ve müvekkillerim mesfûrânın aslâ ve kat‘â alâka ve medhallerimiz kalmayıp müşteri-i mersûm Kiryako zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 Z sene 1247 Şuhûdü’l-hâl: Eş-şâhidûnü’s-sâbikūn.